తెల్లోడికి రోల్స్ రాయిస్ తో షాకిచ్చిన పంజాబీ

కాలం ఎంత మారినా.. త‌మ‌లో మాన‌వ‌త్వం ట‌న్నులు ట‌న్నులు ఉన్న‌ట్లు గొప్ప‌లు చెప్పుకునే తెల్ల‌తోలుకి అహంభావం ఎక్కువే. గేలి చేయ‌టంలో వారి త‌ర్వాతే ఎవ‌రైనా. అయితే.. చిత్ర‌మేమంటే.. ఇలా గొప్పులు పోయే తెల్లోళ్ల‌కు మ‌నోళ్లు ఇచ్చే షాకులు మొద‌ట్నించి ఎక్కువే. తాజాగా.. అలాంటి షాకిచ్చాడో పంజాబీ. త‌న‌ను గేలి చేసే ప్ర‌య‌త్నం చేసిన తెల్లోడికి దిమ్మ తిరిగే షాకివ్వ‌ట‌మే కాదు.. భార‌తీయుల‌తో పెట్టుకుంటే దెబ్బేరోయ్ అన్న‌ట్లుగా బ‌దులిచ్చిన వైనం ఇప్పుడు సోష‌ల్ మీడియాలో వైర‌ల్ గా మారింది.

ఇంత‌కీ జ‌రిగిందేమంటే.. లండ‌న్ లో మ‌నోళ్లు చాలామంది ఉండే విష‌యం తెలిసిందే. అందులో సిక్కులు కూడా. వారికొచ్చే ఇబ్బందేమంటే.. వారు ధ‌రించే త‌ల‌పాగాను.. చాలామంది ఎట‌కారం చేస్తారు. వారికేమో ట‌న్నుల‌.. ట‌న్నుల ఆత్మాభిమానం. ఎవ‌రైనా ఏమైనా అంటే అస్స‌లు ఊరుకోరు. మాట ప‌డ‌రు. మాట‌కు మాట ఇచ్చేందుకు వెనుకాడ‌రు. తాజాగా లండ‌న్ లో ఉండే రూబెన్ సింగ్‌ కు ఇలాంటి ప‌రిస్థితే ఎదురైంది. అత‌గాడు ఆల్ డేపా కంపెనీ సీఈవో. ఒక తెల్లోడు.. మ‌న సింగ్ జీని చూసి.. ఆయ‌న ధ‌రించిన త‌ల‌పాగాను బ్యాండేజీగా వేళాకోళం ఆడేశాడు.

ఈ అవ‌మానానికి కాస్త భిన్నంగా బ‌దులు తీర్చుకోవాల‌ని డిసైడ్ అయ్యాడు. త‌న ప‌గ‌డీ త‌న ఆత్మాభిమానానికి గుర్తు అని పేర్కొన‌ట‌మేకాదు.. త‌న‌ను ఎట‌కారం చేసిన వ్య‌క్తికి ఒక చిత్ర‌మైన స‌వాల్ విసిరాడు. తాను ధ‌రించే ప‌గ‌డీల‌కు క‌ల‌ర్ కు త‌గ్గ‌ట్లు రోల్స్ రాయిస్ ను వారంలో మ్యాచ్ చేస్తాన‌ని చెప్పాడు. దీనికి స‌ద‌రు తెల్లోడు.. అది సాధ్యం కాద‌నేశాడు.

అంతే.. త‌న రోల్స్ రాయిస్ కార్ల‌కు మ్యాచ్ అయ్యే ప‌గ‌డీలను త‌యారు చేయించి.. త‌న రోల్స్ రాయిస్ కార్ల ముందు అలానే మ్యాచ్ అయ్యే ప‌గ‌డీలు ధ‌రించి ఫోటోలు దిగి సోష‌ల్ మీడియాలో షేర్ చేశాడు.దీంతో.. స‌ద‌రు ఆంగ్లేయుడికి దిమ్మ తిరిగిన ప‌రిస్థితి. తాజాగా ఈ పోస్టు సోష‌ల్ మీడియాలో ఇప్పుడు వైర‌ల్ గా మారింది.