బీజేపీ కంటే బాబు నాలుగు ఆకులు ఎక్కువేన‌ట‌

ఆంధ్రప్రదేశ్ ముఖ్యమంత్రి చంద్రబాబునాయుడు ప్రేరేపిస్తున్న పార్టీ ఫిరాయింపుల అంశంపై 'సేవ్ డెమోక్రసీ' పేరిట వైఎస్ ఆర్ కాంగ్రెస్ అధినేత వైఎస్ జగన్ ఢిల్లీ టూర్ ఫ‌లితం ఎలా ఉన్నా ప్ర‌చారం మాత్రం బాగానే జ‌రుగుతోంది. త‌న పార్టీకి చెందిన ఎంపీలు - ఎమ్మెల్యేలు - ఎమ్మెల్సీల బృందంతో హోం మంత్రి రాజ్‌నాథ్ సింగ్‌ ను జ‌గ‌న్‌ క‌లిశారు. ఈ సందర్భంగా విజ్ఞాపన పత్రం - చంద్ర‌బాబుపై రాసిన 'ది ఎంపరర్ ఆఫ్ కరప్షన్' అనే పుస్తకాన్ని కూడా కేంద్ర హోమంత్రికి వైఎస్ జగన్ అంద‌జేశారు. అమరావతి పేరుతో భూముల దోపిడీ - కరెంటు దోపిడీ - ఇసుక మాఫియాలను ఇలా అన్ని అంశాలు ఈ పుస్తకంలో ఉన్నట్లు స‌మాచారం. పూర్తి ఆధారాలతో - డాక్యుమెంట్లు కూడా ఈ పుస్తకంలో మొత్తం లక్షా ముప్పైవేల కోట్ల రూపాయల అవినీతి వ్యవహారం ఈ పుస్తకంలో పొందుపరిచిన‌ట్లు అనంత‌రం మీడియాతో మాట్లాడుతూ జ‌గ‌న్ తెలిపారు.

అనంత‌రం సీపీఎం ప్రధాన కార్యాలయంలో సీపీఎం జాతీయ ప్రధాన కార్యదర్శి సీతారాం ఏచూరి క‌లిశారు. ఏపీలో విచ్చలవిడిగా ఎమ్మెల్యేల కొనుగోళ్లు - అవినీతి కార్యకలాపాలు సాగుతున్నాయ‌ని ఆయన దృష్టికి తెచ్చారు. అనంతరం జగన్ - ఇతర నేతలతో కలిసి సీతారాం ఏచూరి మీడియాతో మాట్లాడారు. ఇంత పెద్ద ఎత్తున రాజకీయ అవినీతి - దిగజారుడు తనాలను దేశంలో ఎక్కడా చూడలేదని, ఈ వివరాలన్నింటినీ జగన్ తనకు చెప్పారని తెలిపారు.

ఉత్తరాఖండ్ కంటే ఎన్నో రెట్లు ఎక్కువగా ఎమ్మెల్యేల కొనుగోళ్లు ఏపీలో జరుగుతున్నాయని, ఈ వ్యవహారాన్ని తాము సీరియస్‌గా తీసుకుంటున్నామని తెలిపారు. అసలు దేశంలోనే ఇంత పెద్ద ఎత్తున అవినీతి జరగడాన్ని ఎక్కడా చూడలేదని ఆయన ఆశ్చర్యం వ్యక్తం చేశారు. విచ్చలవిడిగా అవినీతికి పాల్పడటం - ఎమ్మెల్యేలను కొనుగోలుచేసి వాళ్లకు పదవులు ఇవ్వడం సరికాదని అన్నారు. చట్టాలను బైపాస్ చేసి ఇలా చేయడం ఆశ్చర్యకరమైన విషయమని, దీన్ని చాలా తీవ్రమైన విషయంగా పరిగణిస్తున్నామని చెప్పారు. ఈ అంశాన్ని పార్లమెంటులో లేవనెత్తే ప్రయత్నం కూడా చేస్తామని అన్నారు.