వివాదంలో వైసీపీ ఎమ్మెల్యే కుమారుడు... మహిళ ఆత్మహత్యాయత్నం

ఏపీలో ప్రజలకు సుపరిపాలన అందించాలని వైసీపీ అధినేత, సీఎం జగన్ కృషి చేస్తోన్న సంగతి తెలిసిందే. అయితే, అదే సమయంలో కొందరు వైసీపీ ఎమ్మెల్యేలు వివాదాల్లో చిక్కుకోవడంతో పార్టీకి చెడ్డపేరు వస్తోంది. ఈ మధ్య కాలంలో కొందరు వైసీపీ నేతలు, ఎమ్మెల్యేలు వివాదాల్లో చిక్కుకుంటున్నారు. తన మాజీ అనుచరుల నుంచి ప్రాణహాని ఉందని తాడికొండ ఎమ్మెల్యే ఉండవల్లి శ్రీదేవి పోలీసులకు ఫిర్యాదు చేయడం కలకలం రేపింది. ఆ వ్యవహారం సద్దుమణగక ముందే తాజాగా మరో వైసీపీ ఎమ్మెల్యే వివాదంలో చిక్కుకున్నారు. బనగానపల్లి ఎమ్మెల్యే కాటసాని రామిరెడ్డి కుమారుడు ఓబులరెడ్డి పై ఓ మహిళ సంచలన ఆరోపణలు చేసింది. నంద్యాలలో రూ.3 కోట్లు విలువ చేసే 50 సెంట్ల భూమిని బంధువుల చేత రిజిస్టర్ చేయించుకున్నారని శ్రీలక్ష్మీ దేవి అనే మహిళ ఆరోపించింది.

ఈ వ్యవహారంలో మనస్తాపం చెందిన శ్రీలక్ష్మీ దేవి ఆత్మహత్యయత్నం చేయడంతో ఆమెను నంద్యాలలో ఓ ప్రైవేట్ అసుపత్రికి తరలించి చికిత్స అందిస్తున్నారు. ప్రస్తుతం శ్రీలక్ష్మీదేవి అపస్మారక స్థితిలో ఉందని తెలుస్తోంది. కోట్ల విలువ జేసే తమ స్థలం లాగేసుకుంటున్నందునే తన తల్లి ఆత్మహత్యకు ప్రయత్నించిందని ఆమె కుమార్తె భాగ్యలక్ష్మి ఆరోపించారు. తమకున్న ఒకే ఒక ఆధారం ఆ స్థలమని, అది పోతే తాము రోడ్డున పడతామని భాగ్యలక్ష్మి ఆవేదన వ్యక్తం చేశారు. అయితే, ఈ వ్యవహారంలో వచ్చిన ఆరోపణలపై పోలీసులు కేసు నమోదు చేశారా లేదా అన్నది తెలియాల్సి ఉంది.