భారత ఆర్మీకి సోనూసూద్...ఎం జరిగింది అంటే !

కరోనా కల్లోలంలో ఎంతో మందిని ఆదుకొని దేశవ్యాప్తంగా రియల్ హీరోగా మారాడు ప్రముఖ నటుడు సోనూ సూద్. ఇప్పటికీ సాయం చేస్తూ తన ఉదారత చాటుకుంటున్నాడు. అయితే సోనూ సూద్ అంశం ఒకటి తాజాగా ఇండియన్ ఆర్మీలో కలకలం రేపుతోంది. అయితే ఈ అంశంలో సోనూ సూద్ కు ఎలాంటి సంబంధం లేకపోయినా కేంద్రబిందువు అయ్యారు.

ఈ మధ్య రాజస్థాన్ లోని జైసల్మీర్ లో ఇన్ఫాంట్రీ బెటాలియన్ కు చెందిన ఓ కమాండింగ్ మిలటరీ ఆఫీసర్ (సీఓ) సోనూ సూద్ కు ఓ లేఖ రాశారు. కరోనా తగ్గించేందుకు ఏమేం కావాలో రాసి సాయం చేయాల్సిందిగా కోరారు. జైసల్మీర్ మిలటరీ స్టేషన్ దగ్గర 200 పడకల కోవిడ్ కేర్ సెంటర్ ను ఏర్పాటు చేయాలని తెలిపారు. ఆ లేఖ సోషల్ మీడియాలో వైరల్ గా మారింది. చివరకు ఇండియన్ ఆర్మీ కూడా సోనూ సూద్ సాయం కోరిందని ప్రచారం సాగింది.

కాగా ఇండియన్ ఆర్మీ దేశవ్యాప్తంగా చాలా చోట్ల కోవిడ్ కేర్ ఆస్పత్రులను ఏర్పాటు చేసింది. ఇందుకు కావాల్సిన సామగ్రిని ఆర్మీ స్వయంగా సమకూర్చింది. ప్రస్తుతం కరోనా కల్లోలంలోనూ ఆర్మీ రంగంలోకి దిగి దేశంలోని పలు ప్రాంతాల్లో ఆస్పత్రులు ఏర్పాటు చేస్తూ అన్ని సదుపాయాలను ఆర్మీయే ఖర్చు చేస్తోంది.

అయితే సోనూ సూద్ మాత్రం పేదలకే సాయం చేస్తుంటారు. తన నెట్ వర్క్ ను ఏర్పాటు చేసుకొని సాయం చేస్తున్నాడు. అయితే ఓ ఆర్మీ ఆఫీసర్ లేఖ రాయడంతో ఇండియన్ ఆర్మీ కూడా సోనూ సూద్ సాయం కోరుతోందని కామెంట్లు వినిపిస్తున్నాయి.

ఈ లేఖ రాసిన మాట వాస్తవమేనని ఢిల్లీలోని ఇండియన్ ఆర్మీ ప్రధాన కార్యాలయంలోని ఓ సీనియర్ ఆఫీస్ ధృవీకరించారు. అత్యుత్సాహంతోనే ఇలా రాశాడని చెప్పుకొచ్చారు.