ఆసుప‌త్రికని చెప్పి క్యాసినోల్లో త‌లైవా?

ఇటీవ‌ల ఆరోగ్యం బాగోలేదంటూ త‌లైవా హెల్త్ మీద త‌ర‌చూ ఏదో ఒక వార్త సోష‌ల్ మీడియాలో హ‌డావుడి చేస్తోంది. అయితే.. ర‌జ‌నీ ఆరోగ్యం భేషుగ్గా ఉంద‌న్న రీతిలో తాజాగా ఫోటోలు కొన్ని బ‌య‌ట‌కు వ‌చ్చాయి. ఇదిలా ఉంటే తాజాగా ఆయ‌న ఒక క్యాసినోలో కూర్చున్న ఫోటో సోష‌ల్ మీడియాలో వ‌చ్చింది.

ఇదిలా ఉంటే.. ఏ చిన్న అవ‌కాశం వ‌చ్చినా ర‌జ‌నీకాంత్ మీద తీవ్ర‌స్థాయిలో విరుచుకుప‌డే బీజేపీ ఫైర్ బ్రాండ్‌.. వివాదాస్ప‌ద వ్యాఖ్య‌ల‌కు కేరాఫ్ అడ్ర‌స్‌.. సీనియ‌ర్ రాజ‌కీయ నేత సుబ్ర‌మ‌ణ్య‌స్వామి తాజాగా మ‌రోసారి విరుచుకుప‌డ్డారు. అమెరికాకు ఆరోగ్య ప‌రీక్ష‌ల కోసం ర‌జ‌నీకాంత్ వెళ్లిన‌ట్లుగా చెబుతున్నారు.

ఈ సంద‌ర్భంగా క్యాసినోలో ర‌జ‌నీ కూర్చున్న ఫోటోను పోస్ట్ చేసిన సుబ్ర‌మ‌ణ్య‌స్వామి.. వావ్‌.. ర‌జ‌నీకాంత్ అమెరికాలోని ఓ క్యాసినోకి వెళ్లారు.. త‌న ఆరోగ్యం కుదుట ప‌డాల‌ని గ్యాంబ్లింగ్ చేస్తున్నారేమో అంటూ ఎట‌కారం ఆడేశారు.

అంతేనా.. త‌లైవాకి అంత డ‌బ్బు ఎక్క‌డిదో ఈడీ వెంట‌నే విచార‌ణ చేప‌ట్టాలంటూ కొత్త సందేహాన్ని తెర మీద‌కు తీసుకొచ్చారు. ఓప‌క్క ర‌జ‌నీ రాజ‌కీయ రంగప్ర‌వేశాన్ని సీనియ‌ర్ క‌మ‌ల‌నాథులు ప‌లువురు ఆహ్వానం ప‌లుకుతుంటే.. అందుకు భిన్నంగా సుబ్ర‌మ‌ణ్య స్వామి మాత్రం ఆయ‌న్ను తీవ్రంగా వ్య‌తిరేకిస్తున్నారు.

ర‌జ‌నీ తాను నిజ‌మైన త‌మిళ వ్య‌క్తి అని నిరూపించుకోవాల‌ని.. ఆయ‌న రాజ‌కీయాల్లోకి వ‌స్తే వ్య‌వ‌స్థ నాశ‌న‌మ‌వుతుంద‌ని మండిప‌డ్డారు. ర‌జ‌నీ రాజ‌కీయాల్లోకి ప‌నికిరార‌ని తీవ్ర వ్యాఖ్య‌లు చేసి.. ఆయ‌న కుంభ‌కోణాల‌కు పాల్ప‌డ్డార‌ని ఆరోపించారు.