రాజకీయాల్లో ఎన్టీఆరే వరస్ట్ అట

నందమూరి తారక రామారావును సినీ నటుడిగా ఎంత అభిమానిస్తారో.. రాజకీయ నాయకుడిగానూ అంతే ఆరాధిస్తారు తెలుగు జనాలు. తెలుగు రాజకీయాల్లో గొప్ప నేతగా ఎన్టీఆర్ ను కీర్తిస్తారు. అలాంటి నాయకుడి గురించి భారతీయ జనతా పార్టీ వివాదాస్పద నేత సుబ్రమణ్య స్వామి చేసిన వ్యాఖ్యలు దుమారం రేపుతున్నాయి. సినీ రంగం నుంచి రాజకీయాల్లోకి వచ్చిన వాళ్లలో ఎన్టీఆరే అందరి కంటే వరస్ట్ అని తీర్మానించారు సుబ్రమణ్యస్వామి. తమిళ సూపర్ స్టార్ రజినీకాంత్ రాజకీయ అరంగేట్రం గురించి పెద్ద చర్చ నడుస్తున్న నేపథ్యంలో ఆయన్ని విమర్శించే క్రమంలో సుబ్రమణ్యస్వామి.. యాక్టర్ టర్న్డ్ పొలిటీషియన్లందరి మీదా విరుచుకుపడ్డాడు.

ఒక్క కామరాజ్ మినహాయిస్తే సినిమాల నుంచి రాజకీయాల్లోకి వచ్చిన వాళ్లందరూ వేస్టే అని తేల్చేశారు సుబ్రమణ్యస్వామి. తమిళ ప్రజలు గొప్ప నేతలుగా భావించే ఎమ్జీఆర్.. జయలలిత కూడా రాజకీయాల్లో విఫలమయ్యారని సుబ్రమణ్యస్వామి అనడం గమనార్హం. ఎన్టీఆర్ సైతం రాజకీయాల్లో ఘోరంగా విఫలమయ్యారని.. రాజకీయాల్లోకి వచ్చిన సినీ తారల్లో ఆయనే వరస్ట్ అని విమర్శించిన సుబ్రమణ్యస్వామి చిరంజీవిని కూడా వదల్లేదు. చిరంజీవి కేంద్ర పర్యాటక మంత్రిగా కూడా పని చేశాడని.. కానీ ఆయన ఏం చేశారో తనతో పాటు ఎవ్వరికీ తెలియదని ఎద్దేవా చేశారు. భాజపా ఎంపీగా ఉన్న బాలీవుడ్ నటుడు శత్రుఘ్న సిన్హా మాత్రమే రాజకీయాల్లో మంచి పేరు సంపాదించినట్లుగా సుబ్రమణ్యస్వామి కితాబివ్వడం విశేషం. శత్రుఘ్న దేశ ప్రజలందరికీ తెలుసని.. ఆయన రాజకీయాల్లో విజయవంతమయ్యారని అన్నారు సుబ్రమణ్యస్వామి. ఇక రజినీకాంత్ రాజకీయాలకు అస్సలు పనికి రాడని.. ఆయన సరిగా చదువుకోలేదని.. ఆయన తమిళుడే కాదని సుబ్రమణ్యస్వామి ఇంతకుముందే విమర్శించిన సంగతి తెలిసిందే.

Like Us on Facebook : https://www.facebook.com/Tupakidotcom/