ఈ ఆదివారం సంచలనం ఏమిటి బాసూ..?

సండే వస్తే కాస్త సావధానంగా ఉండి రిలాక్స్‌ అయ్యే పరిస్థితి తెలుగుదేశం పార్టీ నేతల్లో కనిపించటం లేదు. సండే వస్తుందంటే చాలు వారు హడలిపోతున్న పరిస్థితి. కొత్త టెన్షన్‌ ఏమి వచ్చి పడుతుందా అని ఉక్కిరిబిక్కిరి అవుతున్నారు. గత రెండు ఆదివారాలుగా ఊహించని పరిణామాలు చోటు చేసుకోవటం.. సండే అంటే చాలు సంచలనంగా మారిపోయిన పరిస్థితి.

రెండు వారాల క్రితం ఆదివారం సాయంత్రం టీటీడీపీ నేత రేవంత్‌రెడ్డికి సంబంధించిన వీడియో సీడీ బయటకు వచ్చి పెను దుమారం రేపింది. ఓటుకు నోటుతో టీఆర్‌ఎస్‌ ఎమ్మెల్సీని బేరమాడుతున్న దృశ్యాలు టీవీల్లో వచ్చి రాజకీయంగా పెను సంచలనానికి దారి తీసింది. ఈ ఘటన జరిగిన మరో వారం.. తర్వాత ఆదివారం సాయంత్రం ఏపీ ముఖ్యమంత్రి చంద్రబాబు మాట్లాడినట్లుగా చెబుతున్న ఆడియో ఒకటి టీవీ ఛానళ్లలో ప్రసారమై భారీ సంచలనానికి దారి తీసింది.

ఇలా గడిచిన రెండు ఆదివారాల్లో రాజకీయంగా సంచలనం సృష్టించే అంశాలకు సంబంధించిన ఆధారాలు బయటకు వస్తున్న నేపథ్యంలో.. దానికి కొనసాగింపుగా ఈ ఆదివారం ఎలాంటి సంచలనం బయటకు వస్తుందా? అన్నది ఆసక్తికరంగా మారింది. తెలంగాణ అధికారపక్షం దగ్గర సంచలన సీడీలు అయిపోయాయని ఓ పక్క వాదన వినిపిస్తుంటే.. అలాంటిదేమీ లేదు.. మరికొన్ని ఉన్నాయన్న కొందరు ఉత్సాహవంతులు చెబుతున్నారు. మరి.. అందులో నిజం పాళ్లు ఏమిటో తేలాలంటే.. ఈ సండే రాత్రి వరకూ వెయిట్‌ చేయక తప్పదు.