కీల‌క‌వేళ హిమాల‌యాల్లో ధ్యాన‌మా ర‌జ‌నీ?

ఇంట్లో నుంచి అడుగు తీసి బ‌య‌ట‌కు పెడితే ల‌క్ష‌లాది మంది ఆయ‌న చుట్టూ చేర‌తారు. ఆయ‌న మాట్లాడితే వినాల‌ని కోట్లాదిమంది త‌హ‌త‌హ‌లాడ‌తారు. ఆయ‌న వీధుల్లోకి న‌డుచుకుంటూ వెళితే వ్య‌వ‌స్థ‌ల‌న్నీ నిలిచిపోయే ప‌రిస్థితి. అంత భారీ ఇమేజ్ కోలీవుడ్ సూప‌ర్ స్టార్ ర‌జ‌నీకాంత్ సొంతం. సుదీర్ఘ‌కాలం సినిమాల్లో న‌టిస్తున్న ఆయ‌న‌..రాజ‌కీయాల్లోకి రావాలా? వ‌ద్దా? అన్న మీమాంస‌ను వ‌దిలేసి పాలిటిక్స్ లోకి రావాల‌ని ఈ మ‌ధ్య‌నే డిసైడ్ కావ‌టం తెలిసిందే.

త్వ‌ర‌లో ఆయ‌న న‌టించిన కాలా సినిమా విడుద‌ల కానుంది. ఈ చిత్రాన్ని వ‌చ్చే నెల 27న విడుద‌ల చేస్తార‌ని ప్ర‌క‌టించారు. ర‌జ‌నీ సినిమా వ‌స్తుందంటే ఒక పెద్ద ప‌ర్వ‌దినంగా ఫీల‌య్యేవారు ల‌క్ష‌లాది మంది ఉంటారు. దేశంలో ఎంతోమంది అగ్ర‌న‌టులు ఉన్నా.. ర‌జ‌నీకున్న ఇమేజ్ అంతా ఇంతా కాదు. ఓప‌క్క సినిమాలు.. మ‌రోప‌క్క రాజ‌కీయాల్లో కీ రోల్ పోషించేందుకు సిద్ధ‌మ‌వుతున్న వేళ‌.. ర‌జ‌నీ అనూహ్య నిర్ణ‌యం తీసుకున్నారు. తాజాగా ఆయ‌న హిమాల‌యాల‌కు వెళ్లాల‌ని నిర్ణ‌యించుకున్నారు. మాన‌సిక ప్ర‌శాంత‌త కోసం.. త‌న‌లోని మ‌నిషిని త‌ర‌చి చూసుకునేందుకు ర‌జ‌నీ త‌ర‌చూ హిమాల‌యాల‌కు వెళ్లి.. ధ్యానం చేస్తుంటారు.

తాజాగా మ‌రోసారి హిమాల‌యాల‌కు వెళ్లేందుకు ఆయ‌న రెఢీ అయ్యారు. ఈ రోజు (శ‌నివారం)ఆయ‌న హిమాల‌యాల‌కు వెళుతున్నారు. ర‌జ‌నీ హిమాల‌యాల‌కు వెళుతున్న మాట నిజ‌మేన‌ని ఆయ‌న ప్ర‌తినిధి రియాజ్ ట్వీట్ చేశారు. ర‌జ‌నీ విప‌రీతంగా అభిమానించే మ‌హా అవ‌తార్ బాబాజీ (బాబా సినిమాలో ఆయ‌న్ను చూపించారు) హిమాల‌యాల్లో దున‌గిరి అనే ప్రాంతంలో ధ్యానం చేస్తుండేవారు. ఇప్పుడు అదే ప్రాంతంలో ధ్యానం చేయ‌టానికి ర‌జ‌నీ వెళుతున్నారు. రాజ‌కీయాల్లోకి వ‌ద్దామ‌నుకుంటున్న కీల‌క వేళ‌.. అన్నింటిని వ‌దిలేసి ముక్కు మూసుకొని ధ్యానం చేయ‌టానికి ర‌జ‌నీ వెళ్ల‌టం ఇప్పుడు ఆస‌క్తిక‌రంగా మారింది.