షాకింగ్ స్టేట్మెంట్ : పార్టీ కోసం చావడానికైనా రెడీ...?

అవునా. ఇది నిజమా. ఈ రోజుల్లో కూడా అలా జరుగుతుందా అంటే అవును అనే అంటున్నారు టీడీపీకి చెందిన సీనియర్ నేత, మాజీ మంత్రి చింతకాయల అయ్యన్నపాత్రుడు. ఆయన టీడీపీ వల్లనే తాను రాజకీయల్లోకి వచ్చి ఈ స్థాయిని ఎదిగాను అని అంటున్నారు. తాను ఏ విషయంలోనూ అసలు తగ్గేది లేదని కూడా అంటున్నారు.

తనకు భయం అంటే తెలియదు అని కూడా అయ్యన్న చెప్పుకుంటున్నారు. టీడీపీ కోసం చావడానికైనా నేను రెడీ అని అయ్యన్న సంచలన స్టేట్మెంట్ ఇచ్చేశారు. ఆయన వైసీపీ ఫైర్ బ్రాండ్ లీడర్ కొడాలి నాని ఇలాకా గుడివాడలో తనదైన పంచ్ డైలాగులతో కేక పుట్టించారు.

పార్టీ ఎంతో ఇచ్చింది. ఇపుడు పార్టీ కోసం అంతా చేయాల్సిందే అని అయ్యన్న అంటున్నారు. ఎన్టీయార్ మోచేతి నీళ్ళు తాగి చంద్రబాబు చలవతో ఎమ్మెల్యే అయిన గుడివాడ వైసీపీ నేత కొడాలి నాని ఇపుడు బాబుని, ఆయన ఫ్యామిలీని విమర్శించడం దారుణమని అయ్యన్న అన్నారు.

టీడీపీ ఒక ప్రభంజనమని ఎపుడు ఎన్నికలు జరిగినా పార్టీ అధికారంలోకి రావడం ఖాయమని కూడా ఆయన చెప్పారు. వైసీపీ పాలనలో జనాలు ఇబ్బందులు కళ్ళారా చూస్తున్నామని ఆయన పేర్కొనడం విశేషం. మొత్తానికి ఈ మాటలు అన్నీ ఎలా ఉన్నా తాను పార్టీ కోసం ఏమైనా చేస్తాను అన్న అయ్యన డైలాగులు మాత్రం ఇపుడు పార్టీలోపలా బయటా తెగ వైరల్ అవుతున్నాయి.

ఆరున్నర పదుల వయసులో అయ్యన్నలో ఎక్కడా ఫైర్ చల్లారలేదని కూడా తమ్ముళ్ళు అంటున్నారు. అయ్యన్నను స్పూర్తిగా తీసుకుంటే కనుక పార్టీ పరుగులు పెడుతుంది అని అంటున్న వారూ టీడీపీలో ఉన్నారు. ఇక గుడివాడలో అయ్యన్నతనదైన శైలిలో మాటలతో చెలగాటమే ఆడారు.

ఈ వయసులో తన మీద రేప్ కేసులు పెట్టిన వైసీపీని ఏమనాలి తమ్ముళ్ళూ అని ఆయన నిలదీసిన వైనం కూడా ఆకట్టుకునేలా ఉందని అంటున్నారు. మరి అయ్యన్న దూకుడు మాటల నుంచి చేతల దాకా వచ్చింది. వైసీపీ సర్కార్ కి పెట్టే కేసులకు అసలు జడిసే సీనే లేదని మాజీ మంత్రి అంటున్నారు. బస్తీ మే సవాల్ అని కూడా సవాల్ చేస్తున్నారు. ఆయన ఫ్యాన్స్ అయితే అయ్యన్నా మజాకానా అని తెగ మురుస్తున్నారు.