కాకినాడ‌లో త‌మ్ముళ్ల సీక్రెట్ మీటింగ్ ఫోటోలు వ‌చ్చాయ్!

ఏపీ విప‌క్షం టీడీపీలో ఏదో జ‌రుగుతుందంటూ గ‌డిచిన రెండురోజులుగా మీడియాలో చాలానే వార్త‌లు వ‌స్తున్నాయి. బీజేపీలోకి టీడీపీ రాజ్య‌స‌భ స‌భ్యులు.. లోక్ స‌భ స‌భ్యుల‌తో పాటు.. ప‌లువురు ఎమ్మెల్యేలు.. మాజీ ఎమ్మెల్యేలు కూడా వెళుతున్న‌ట్లుగా వార్తలు వ‌స్తున్నాయి. ఇలాంటివేళ‌లోనే కాకినాడ‌లో తెలుగుత‌మ్ముళ్లు ర‌హ‌స్య స‌మావేశాన్ని నిర్వ‌హిస్తున్న‌ట్లుగా బ్రేకింగ్ లు వ‌చ్చాయి.

అయితే. వారి ర‌హ‌స్య భేటీకి సంబంధించి వివ‌రాలు బ‌య‌ట‌కు రాలేదు. తాజాగా ఆ కొర‌త తీరుస్తూ ఫోటోలు బ‌య‌ట‌కు వ‌చ్చాయి. కాకినాడ రైల్వేస్టేష‌న్ స‌మీపంలోని ఒక హోట‌ల్లో టీడీపీ నేత‌లు ప‌లువురు భేటీ అయిన‌ట్లుగా తెలుస్తోంది. అయితే.. ఈ సీక్రెట్ మీటింగ్‌ లో ఉన్న వారంతా కాపు సామాజిక వ‌ర్గానికి చెందిన వారేన‌ని చెబుతున్నారు.

వీరంతా టీడీపీ నుంచి బీజేపీలోకిచేర‌తార‌న్న ప్ర‌చారం జ‌రుగుతుంటే.. హోట‌ల్ వ‌ద్ద‌కు వెళ్లిన మీడియా వారితోమాత్రం వారు నో.. పార్టీ మారే ఆలోచ‌న లేదంటున్నారు. ఈ స‌మావేశానికి పెద్ద ఎత్తున నేత‌లు హాజ‌రుకావ‌టం క‌ల‌క‌లం రేపే అంశంగా చెప్పాలి.

కాకినాడ‌లో జ‌రుగుతున్న ర‌హ‌స్య స‌మావేశానికి హాజ‌రైన తెలుగు త‌మ్ముళ్లు ఎవ‌ర‌న్న విష‌యానికి వ‌స్తే..

+ బూరగడ్డ వేదవ్యాస్‌
+ బొండా ఉమ
+ బడేటి బుజ్జి
+ కదిరి బాబూరావు
+ చెంగళ్రాయుడు
+ బండారు మాధవనాయుడు
+ జ్యోతుల నెహ్రూ
+ వరుపుల రాజా
+ మీసాల గీత
+ కేఏ నాయుడు
+ పంచకర్ల రమేశ్‌ బాబు
+ ఈలి నాని