క్రికెట్ ఫీవర్ లో కుర్ర ఎంపీ

వైసీపీ ఎదురు గాలి లోనూ గెలిచిన శ్రీకాకుళం ఎంపీ రామ్మోహన్ నాయుడికి క్రికెట్ అంటే విపరీతమైన క్రేజ్. అలాంటప్పుడు వరల్డ్ కప్ జరుగుతుంటే ఆగుతారా.. అందులోనూ వేసవి కాలం.. ఎంచక్కా హాయిగా కూల్ కంట్రీలో ఇండియా మ్యాచ్‌ లు చూద్దామని ఇంగ్లాండ్ చెక్కేశారాయన. అదిగో.. అక్కడ ఇండియా - ఆస్ట్రేలియా మ్యాచ్ జరుగుతుంటే భార్యతో కలిసి ఫొటో దిగి సోషల్ మీడియాలో పెట్టేశారు. అక్కడ ఇండియన్ క్రికెట్ లెజెండ్ వీవీఎస్ లక్ష్మణ్‌ ను కూడా కలిశారు రామ్మోహన్ నాయుడు.

రెండోసారి పార్లమెంట్ సభ్యుడిగా గెలిచిన రామ్మోహన్.. ఇంతటి వైసీపీ హవాలోనూ తనను గెలిపించిన ప్రజలకు కృతజ్ఞతలు చెప్పుకోవడానికి గాను తన పార్లమెంటు పరిధిలోని అన్ని అసెంబ్లీ నియోజకవర్గాల్లోనూ మళ్లీ పర్యటించి ధన్యవాదాలు చెప్పుకొన్నారు. అలాగే ఎన్నికలకు ముందు ఊరూరూ తిరిగారు. ఇప్పుడు కాస్త రిలీఫ్ దొరకడంతో విదేశీ పర్యటనకు వెళ్లారు. ఈ క్రమంలోనే ప్రస్తుతం ఇంగ్లండ్‌ లో జరుగుతున్న వన్డే ప్రపంచకప్‌ ను ఎంజాయ్ చేస్తున్నారు.

లండన్ వేదికగా ఆస్ట్రేలియా - భారత్ మధ్య జరుగుతున్న వన్డే మ్యాచ్‌ కు తన భార్య శ్రీ శ్రావ్యతో కలిసి వెళ్లారు. ఈ విషయాన్ని తన ఫేస్ బుక్ - ఇన్‌ స్టా - ట్విట్టర్ అకౌంట్ల ద్వారా అభిమానులతో పంచుకున్నారయన. ‘‘ప్రపంచకప్‌ లో భారత్ - ఆసీస్ మధ్య మ్యాచ్ చూడడానికి మించిన మధురానుభూతి ఇంకేమి ఉండదు. గుడ్ లక్ టీమిండియా’’ అంటూ క్రికెట్ స్టేడియంలో తన భార్యతో కలిసి ఉన్న ఫోటోను షేర్ చేశారు. ఇది చూసిన అభిమానులు ఈ ఫోటో ను వైరల్ చేస్తున్నారు. కాగా అక్కడ వీవీఎస్ లక్ష్మణ్ - మరికొందరు మాజీ క్రికెటర్లను కూడా రామ్మోహన్ కలుసుకున్నారు. ఆ ఫొటోలను కూడా ఆయన షేర్ చేశారు.