టీవీలో రాబోతున్న 'యాత్ర'.. టీడీపీ ఒప్పుకుంటుందా!

దివంగత ముఖ్యమంత్రి వైఎస్ రాజశేఖర రెడ్డి చేపట్టిన ప్రజా ప్రస్థాన యాత్ర ఆధారంగా వచ్చిన ‘యాత్ర’ సినిమా టెలివిజన్ ప్రీమియర్స్ కు రంగం సిద్ధం అయ్యింది. దాదాపు యాభై రోజుల కిందట వచ్చి విజయవంతం అయిన ఈ సినిమా ఇప్పుడు టీవీల్లో ప్రసారం కాబోతూ ఉంది. ఈ మేరకు స్టార్ మా టీవీ అందుకు సంబంధించి ప్రకటన చేసింది. ఈ ఆదివారం మధ్యాహ్నం పన్నెండు గంటలకు ‘యాత్ర’ ప్రసారం ఉంటుందని ఆ టీవీ చానల్ ప్రకటించింది.

‘యాత్ర’ సినిమా వైఎస్సార్ కాంగ్రెస్ పార్టీకి కొత్త ఊపును ఇచ్చిన సంగతి తెలిసిందే.వైఎస్ పాదయాత్రను చక్కటి ఎమోషన్స్ తో చిక్కగా రూపొందించిన ఈ సినిమా ప్రేక్షకులను ఆకట్టుకుంది. పాదయాత్ర వంటి సీరియస్ సబ్జెక్టు మీద రూపొందించిన సినిమా అయినా ఇది కమర్షియల్ గా విజయవంతం అయ్యింది. ఈ నేపథ్యంలో ఇప్పుడు ప్రీమియర్స్ కు కూడా రంగం సిద్ధం అవుతోంది.

ఇది వైఎస్సార్ కాంగ్రెస్ పార్టీకి అనుకూలమైన అంశం అని చెప్పవచ్చు. పోలింగ్ కు సమయం ఆసన్నం అవుతున్న వేళ ఈ సినిమా టీవీలో ప్రసారం కావడం వైఎస్ ఆర్ కాంగ్రెస్ పార్టీ కి లాభించవచ్చు. మరి ఈ అంశాన్ని టీడీపీ ఈజీగా వదులుతుందా అనేది కూడా చర్చనీయాంశమే.

ఈ సినిమా టెలివిజన్ ప్రీమియర్ షో పై తెలుగుదేశం ఎలా స్పందిస్తుంది - ఈ సినిమా ప్రదర్శను అడ్డుకోవాలని అంటుందా అనేది వేచి చూడాలి.