బాబుకు దక్కిన ఆనందం ఇదొక్కటేనేమో?

ఏపీ విపక్ష నేత.. టీడీపీ అధినేత చంద్రబాబు నాయుడి పరువు నిలబడింది. ఇప్పటికే తాను ప్రాతినిధ్యం వహిస్తున్న కుప్పం అసెంబ్లీ నియోజకవర్గంలో అత్యధిక పంచాయితీల్ని సొంతం చేసుకున్న వైసీపీ దెబ్బకు బాబు ఇమేజ్ భారీగా డ్యామేజ్ అయ్యింది. తాజాగా ముగిసిన పంచాయితీ ఎన్నికల్లో చంద్రబాబు సొంతూరు నారావారి పల్లెలో ఎన్నికలు జరిగాయి. ఈ ఎన్నికల్లో విజయం సాధించేందుకు అధికార పార్టీకి చెందిన మద్దతుదారులు విపరీతంగా ప్రయత్నించారు. కానీ.. నారవారిపల్లె ఓటర్లు మాత్రం.. టీడీపీ మద్దతుదారు వెనుక నిలిచారు.

దీంతో.. బాబు దీర్ఘం ఊపిరి పీల్చుకున్నారని చెప్పాలి. భారీ టెన్షన్ నుంచి బయటపడిన పరిస్థితి. టీడీపీ మద్దతుదారు లక్ష్మీ.. తన సమీప ప్రత్యర్థిపై 563 ఓట్లు మెజార్టీతో విజయం సాధించారు. తాజా ఫలితాలపై టీడీపీ వర్గీయులు ఆనందం వ్యక్తం చేశారు.ఈ ఎన్నికల అంశంపై చంద్రబాబు వ్యక్తిగతంగా జోక్యం చేసుకున్నట్లు చెబుతున్నారు.

నారావారిపల్లెలో వైసీపీ జెండా ఎగురవేయాలని విపరీతంగా ప్రయత్నించినా ఫలితం లేకపోయింది. ఇప్పటికే కుప్పంలో తగిలిన షాక్ తో చంద్రబాబు తీవ్రమైన ఇబ్బందిని ఎదుర్కొంటున్నారు. ఆయన రాజకీయ ప్రత్యర్థులు.. బై బాబు అన్న ప్రచారాన్ని తెర మీదకు తీసుకురావటం తెలిసిందే. ఇలాంటివేళలో.. నారావారిపల్లెలో టీడీపీ మద్దతుదారు విజయం సాధించిన వైనం చూసినప్పుడు.. బాబు పరువును సొంతూరు కాపాడిందని చెప్పాలి. మొత్తంగా పంచాయితీ ఎన్నికల్లో బాబు ముఖాన చిరునవ్వు పూసేలా చేయటంలో నారావారి పల్లె కీలకభూమిక పోషించిందని చెప్పక తప్పదు.