సర్కారు ఖాతాలోకి సీబీఐటీ..?

పేరు ప్రఖ్యాతులున్న ఇంజినీరింగ్‌ కళాశాలల పేర్లు చెప్పాల్సి వస్తే.. తెలుగు ప్రాంతాల వారు చెప్పే కొన్ని పేర్లలో సీబీఐటీ ఒకటి. చైతన్యభారతి ఇన్‌స్టిట్యూట్‌ ఆఫ్‌ ఇంజినీరింగ్‌ కళాశాల పేరును సింఫుల్‌గా సీబీఐటీగా పేర్కొంటారు. సొసైటీల చట్టం కింద ఏర్పడిన ఈ కళాశాలను తెలంగాణ సర్కారు స్వాధీనం చేసుకుంటుందా? ఆ దిశగా అడుగులు పడుతున్నాయా? అన్నది ఇప్పుడు ఆసక్తికరంగా మారింది.

కొందరు ప్రముఖల నేతృత్వంలో ఏర్పాటు చేసిన ఈ కళాశాలలో ఈ మధ్య చోటు చేసుకున్న ఆర్థిక అవకతవకలు బయటకు పొక్కటం.. దీనికి తోడు ఈ వ్యవహారంలో రాజకీయంగా చోటు చేసుకోవటంతో.. తెలంగాణ సర్కారు ఈ అంశంపై దృష్టి సారిస్తుందని చెబుతున్నారు. ఈ కాలేజీ వ్యవస్థాపకుల్లో మాజీ చీఫ్‌ జస్టిస్‌ కొండా మాధవరెడ్డి కుమారుడు.. టీఆర్‌ఎస్‌ ఎంపీ విశ్వేశ్వరరెడ్డి కూడా పాత్ర ఉన్నప్పటికీ.. ఆయనకు ఏ మాత్రం అవకాశం లేకుండా చేయటం.. మిగిలిన వర్గాల వారు అధిపత్యం చలాయించటంతో.. తెలంగాణ అధికారపక్షం ఈ వ్యవహారంలో జోక్యం చేసుకునే అవకాశాలు మొండుగా ఉన్నాయని చెబుతున్నారు.

దీనికి తోడు.. టీడీపీ ఎంపీ (రాజ్యసభ).. చంద్రబాబుకు అత్యంత సన్నిహితుడైన సుజనాచౌదరి డైరెక్షన్‌లో ఇప్పటి యాజమాన్యం నడుస్తుందని.. ఈ కళాశాలకు చెందిన రూ.400కోట్ల మేర ఆర్థిక అవకతవకలు చోటు చేసుకున్నట్లుగా వార్తలు వస్తున్న నేపథ్యంలో.. ఈ వ్యవహారంలో తెలంగాణ రాష్ట్ర సర్కారు వేలు పెట్టటం ఖాయమన్న వాదన వినిపిస్తోంది. తప్పులు ఎత్తి చూపి ప్రభుత్వం ఈ సంస్థను స్వాధీనం చేసుకునే అవకాశమే ఎక్కువగా ఉందని చెబుతున్నారు. ఒకవేళ అదే జరిగితే.. మిగిలిన బోర్డు సభ్యులు ఎలా స్పందిస్తారన్నది ఇప్పుడు ప్రశ్నగా మారుతోంది.