ఉపాధి కోసం పరాయి దేశం, కట్ చేస్తే దారుణ మోసం

ఉపాధి కోసం వెళితే పరాయిదేశంలో మన వాళ్లే ఆమెకు నరకం చూపిస్తున్నారు. డబ్బు ఆశ చూపి గల్ఫ్ దేశానికి వెళ్లిన ఆమెను గదిలో బంధించారు. నాలుగురోజులు తిండితిప్పలు లేకుండా చేశారు. ఎలాగోలా ఆ మహిళ వీడియో తీసి పంపడంతో ఈ ఘోరం వెలుగుచూసింది.

జీవనోపాధి కోసం కువైట్ వెళ్లిన ఓ పేద యువతి దారుణంగా మోసపోయింది. ఆ మహిళను ఏజెంట్, అతడి మిత్రుడు మంచి ఇంట్లో పనికి కుదురుస్తామంటూ ఆమెను ఓ గదిలో బంధించి చిత్రహింసలు పెట్టారు. కనీసం మహిళకు ఆహారం, నీరు అందించకుండా పస్తులు ఉంచారు. ఈ దారుణానికి ఒడిగట్టారు.

బాధిత మహిళ తన భర్తకు సోమవారం రాత్రి తన దుస్థితిని వీడియో తీసి ఫోన్ ద్వారా పంపించింది. దీంతో ఈ దారుణం వెలుగు చూసింది.

తిరుపతి జిల్లా ఎర్రావారిపాలెం మండలం బోడెవాండ్ల పల్లె పంచాయతీకి చెందిన ఓ మహిళ (26) ఈనెల 24న కువైట్ వెళ్లింది. చెంగల్ రాజు అనే ఏజెంట్ ఆమె గల్ఫ్ చేరేందుకు సహకరించారు.అక్కడికి వెళ్లాక ఓ ఇంట్లో పనికి కుదిర్చారు.

అయితే ఆ ఇంట్లో బాగోలేకపోవడంతో ఇల్లు మార్చమని ఏజెంట్ ను మహిళ కోరింది. ఏజెంట్ చెంగల్ రాజు, అతడి మిత్రుడు బావాజీ ఇదే అదునుగా ఆమెను అక్కడ ఓ గదిలో బంధించారు. ఇంకో ఇంట్లో పనికి కుదురుస్తామని హింసించారు. నాలుగురోజులుగా తిండి పెట్టకుండా నీళ్లు మాత్రమే ఇస్తున్నారని బాధితురాలు భోరున విలపించింది.

సోమవారం రాత్రి 10 గంటలకు తిరుపతిలోని తన భర్తకు వీడియో పంపింది. తనను ఎలాగైనా తిరుపతికి తీసుకొచ్చేయాలని వేడుకుంది. ఈ విషయమై బాధితురాలి భర్త మంగళవారం పోలీసులకు ఫిర్యాదు చేయనున్నట్లు తెలిపారు.