గుడ్ న్యూస్.. ఇక అన్ని వైరస్ లకు ఒకటే వ్యాక్సిన్!

ప్రపంచంలోని జనాలు వరుస బెట్టి వస్తున్న వైరస్ లతో బెంబేలెత్తిపోతున్నారు. మొన్నటి వరకూ సార్స్, మెర్స్ వంటి వైరస్ లతో వణికిపోయిన జనం ప్రస్తుతం కరోనా వైరస్ బారిన పడి విలవిల్లాడుతున్నారు. ఈ వైరస్ కు అడ్డుకట్ట వేసేందుకు చాలా దేశాల శాస్త్రవేత్తలు వ్యాక్సిన్ ను సిద్ధం చేసే పనిలో నిమగ్నమయ్యారు. ఈ పరిస్థితుల నేపథ్యంలో ప్రఖ్యాత కేం బ్రిడ్జ్ యూనివర్సిటీ గుడ్ న్యూస్ తెలిపింది. ప్రపంచంలోని అన్ని వైరస్ ల నిరోధానికి పని చేసేలా ఒకే మందు సిద్ధం చేస్తున్నట్లు ప్రకటించింది. 'డయోస్ -కొవాక్స్ 2 ' పేరుతో వ్యాక్సిన్ ను అభివృద్ధి చేస్తున్నట్లు కేం బ్రిడ్జ్ యూనివర్సిటీ పేర్కొంది. నిజంగా ఇది విజయవంతమై వ్యాక్సిన్ విడుదలయితే చాలా వైరస్ ఇన్ఫెక్షన్ల నిరోధానికి అడ్డుకట్ట వేయవచ్చని వైద్య నిపుణులు చెబుతున్నారు. ఈ వైరస్ కు గబ్బిలాలు సహా అన్ని రకాల జన్యు శ్రేణులను ఎదుర్కొనే శక్తి ఉంటుంది. భవిష్యత్ లో జంతువుల నుంచి మనుషులకు సంక్రమించే అన్ని రకాల వైరస్ ల నాశనానికి ఈ వ్యాక్సిన్ ఉపయోగ పడుతుంది. ప్రస్తుతం క్లినికల్ ట్రయల్స్ లో ఉన్న ఈ వ్యాక్సిన్ అన్ని రకాల పరీక్షలను పూర్తి చేసుకుంది. ఈ వ్యాక్సిన్ ను సూదిలా వేయకుండా స్ప్రింగ్ -పవర్ జెట్ ఇంజక్షన్ ద్వారా నొప్పి లేకుండా చర్మంలోకి ప్రవేశపెట్టొచ్చు. జంతువుల వల్ల మానవుడికి సోకే వైరస్ లు అన్నింటినీ సమర్థవంతగా ఎదుర్కొనేందుకే ఈ వ్యాక్సిన్ ను అభివృద్ధి చేస్తున్నట్లు కేం బ్రిడ్జ్ శాస్త్రవేత్తలు వెల్లడించారు.