వీడియో: తాళి అందించిన డ్రోన్.. కట్టిన వరుడు

కొత్త ఒక వింత.. పాత ఒక రోత అంటారు. ఇప్పుడు ఆ సామెత అక్షరాల నిజం అవుతోంది. సాధారణంగా పండితులు, పురోహితుల ద్వారా మంగళ సూత్రాలు అందిస్తే మంగళప్రదం అని మన శాస్త్రాలు ఘోషిస్తున్నాయి. కానీ ఈ ఆధునిక యుగంలో అంతా హైటెక్ పెళ్లిళ్లు.. హైటెక్ సంప్రదాయాలు వచ్చేశాయి.

పెళ్లిళ్లు కూడా గాల్లోనే చేసుకుంటున్న రోజులు దాపురించాయి. ఈ క్రమంలోనే ఓ పెళ్లిలో డ్రోన్లను తెగ వాడేశారు. ఆఖరుకు తాళిని కూడా అవే అందించడం విశేషం.

దేశవ్యాప్తంగా ఇప్పుడు పెళ్లిళ్లలో వీడియోలు తీసేందుకు డ్రోన్లను తెగ వాడేస్తున్నారు. ఇవిప్పుడు చాలా పాపులర్ అయ్యాయి. అయితే కర్ణాటక రాష్ట్రంలో జరిగిన ఓ క్రైస్తవ వివాహంలో డ్రోన్ వాడిన తీరు చూసి అందరూ ముక్కున వేలేసుకున్నారు. ఆ వీడియో ఒకటి ఇప్పుడు సోషల్ మీడియాలో విపరీతంగా వైరల్ అవుతోంది.

కర్ణాటకలోని ఉడుపి జిల్లాలోని కర్కాల ప్రాంతంలో శనివారం జరిగిన ఓ క్రైస్తవ వివాహంలో డ్రోన్ మంగళసూత్రాన్ని అందించింది. గాల్లోంచి మంగళసూత్రం వచ్చి స్టేజీపైన ఉన్న వరుడికి అందించిన వైనం అందరినీ మెస్మరైజ్ చేసింది. డ్రోన్ తీసుకొచ్చిన ఆ మంగళసూత్రాన్ని తీసుకొని వధువు మెడలో కట్టాడు వరుడు. ఈ వీడియో ఇప్పుడు తెగ వైరల్ అవుతోంది.