ఆర్టీసీ బస్సు ను ఛేజ్ చేసిన మంత్రి ... ఎందుకంటే ?

విద్యాశాఖ మంత్రి స్వయంగా తన కారుతో ఆర్టీసీ బస్సును వెంబడించిన ఘటన కర్ణాటకలో శనివారం జరిగింది. కరోనా కారణంగా మూసివేసిన పాఠశాలలను కర్ణాటకలో ఇటీవలే ఓపెన్ చేశారు. దీంతో ఆరు నుంచి తొమ్మిదో తరగతి విద్యార్థులు పాఠశాలలకు హాజరవుతున్నారు. అయితే, పాఠశాలలకు వెళ్లే విద్యార్థులు కొన్ని మార్గాల్లో కేఎస్‌ఆర్టీసీ బస్సుల కోసం పడిగాపులు కాస్తున్నా వాటిని నిలపకుండా వెళ్లిపోతున్నారు. దీంతో విద్యార్థులు స్కూల్‌కు వెళ్లడం పెద్ద సవాల్‌గా మారింది. ఈ అంశంపై అధికారులకు విద్యార్థులు, వారి తల్లిదండ్రులు పలుమార్లు ఫిర్యాదు చేసినప్పటికీ ఫలితం లేకపోయింది.

ఇదిలా ఉంటే , శనివారం కొరటగెరె వద్ద కొంత మంది విద్యార్థులు కేఎస్‌ ఆర్టీసీ బస్సు కోసం బస్టాప్‌ లో నిలబడి ఉన్నారు. ఈ సందర్భంలోనే కర్ణాటక ప్రాథమిక విద్యా శాఖ మంత్రి ఎస్ సురేష్ కుమార్ ఓ అధికారిక కార్యక్రమంలో పాల్గొనేందుకు బెంగళూరు నుంచి మధుగిరి కి ఆ మార్గంలో వెళుతున్నారు. కొరటగెరె దగ్గర కొందరు విద్యార్థులు బస్టాప్ దగ్గర బస్సు కోసం వేచి ఉండటాన్ని మంత్రి గమనించారు. ఇదే సమయంలో ఓ ఆర్టీసీ బస్సు మంత్రి కారును దాటుకుంటూ ముందుకు వెళ్లింది. ఆ బస్సును ఆపాలని విద్యార్థులు కోరినప్పటికీ డ్రైవర్ నిలపకుండా ముందుకు వెళ్లిపోయాడు.

తన కళ్లేదుటే ఈ ఘటన జరగడంతో మంత్రి సురేష్ ఆశ్చర్యపోయారు. వెంటనే ఆ బస్సును వెంబడించాలని కారు డ్రైవర్‌ కు సూచించారు. కారులో వెంబడించి బస్సును నిలిపివేయించారు. అనంతరం బస్సులోని డ్రైవర్‌, కండక్టర్‌ ను కిందకు దింపి తీవ్ర ఆగ్రహం వ్యక్తం చేశారు. నిర్లక్ష్యంగా వ్యవహరించిన ఇద్దరికీ వివరణ కోరడం మాత్రమే కాదు.. స్కూల్‌కు వెళ్లే విద్యార్థుల కోసం తప్పనిసరిగా బస్సును ఆపాలని ఆదేశించారు. ఈ ఘటనపై స్పందించిన కేఎస్‌ఆర్‌టీసీ.. బాధ్యులపై తగిన చర్యలు తీసుకుంటామని పేర్కొంది. దీనిపై స్థానిజ డివిజన్ కార్యాలయం ఆరా తీస్తోందని ఈ మేరకు కేఎస్‌ ఆర్‌ టీసీ ట్వీట్ చేసింది. మంత్రి చేసిన పనిపై పలువురు ప్రశంసలు కురిపిస్తున్నారు.