ప్ర‌కాశం జిల్లాలో దారుణం... క‌రెంట్ షాక్‌ తో ముగ్గురు విద్యార్థులు మృతి

ప్ర‌కాశం జిల్లాలో బుధ‌వారం ఉద‌యం దారుణం జ‌రిగింది. ఆట‌లు ఆడుకుంటోన్న ముగ్గురు విద్యార్థులు క‌రెంట్ షాక్‌ తో అప్ప‌టిక‌ప్పుడే మృతిచెందారు. జిల్లాలోని సంతమాగులూరు మండలం కొప్పరం గ్రామంలో తీవ్ర విషాదం చోటుచేసుకుంది. ఈ సంఘ‌ట‌న‌లో ముగ్గురు విద్యార్థులు మృతి చెంద‌గా... మరో ఇద్దరు గాయపడ్డారు. గ్రామంలోని జెండా స్తంభాన్ని పట్టుకుని ఆడుకుంటున్న క్రమంలో ఈ ప్రమాదం జరిగినట్టు సమాచారం.

వీరు ఆడుకుంటున్న టైంలో జెండా స్తంభం ఓ వైపు ఒరిగింది. అదే టైంలో ప‌క్క‌నే ఉన్న విద్యుత్ లైన్ తగలడంతో ఆ స్తంబానికి షాక్ వచ్చింది. దీంతో ఆ స్తంభాన్ని ప‌ట్టుకున్న విద్యార్థులు తీవ్ర‌మైన విద్యుత్ ఘాతానికి గుర‌య్యారు. రేపటి స్వాతంత్ర దినోత్సవ వేడుక‌ల్లో అందరు విద్యార్థుల్లాగా సంతోషంగా జెండావందనం చేయాల్సిన ముగ్గురు విద్యార్థులు ఈ లోకాన్ని విడిచి వెళ్ల‌డంతో గ్రామంలో విషాదఛాయలు అలుముకున్నాయి. మృతులు షేక్ పఠాన్ గౌస్ (11)- షేక్ హసన్ బుడే (11)- పఠాన్ అమర్ (11)గా గుర్తించారు.

పోలీసులు సంఘటనాస్థలాన్ని పరిశీలించి దర్యాప్తు చేస్తున్నారు. వీరు ముగ్గురు ఐదో త‌ర‌గ‌తి చ‌దువుతున్నారు. ఏపీలో ప్ర‌స్తుతం వ‌ర్షాలు గ‌ట్టిగా ప‌డుతున్నాయి. ఈ టైంలో ఎర్త్ స‌మ‌స్య‌లు ఎక్కువుగా ఉంటున్నాయి. ముఖ్యంగా ఇనుప పోల్స్‌ కు విద్యుత్ తీగ‌లు త‌గ‌ల‌డంతో వాటికి కూడా విద్యుత్ వ‌స్తోంది. ఈ క్ర‌మంలోనే త‌మ‌కు తెలియ‌కుండానే ఆ పోల్స్ ప‌ట్టుకుంటోన్న వారు క‌రెంట్ షాక్‌ తో గాయాల పాల‌వ్వ‌డ‌మో లేదా మృతి చెంద‌డ‌మో జ‌రుగుతోంది.