కేటీఆర్ సార్.. ఇదేనా బిగ్ న్యూస్?

‘‘రెండు రోజుల్లో ఓ బిగ్ న్యూస్ చెప్పబోతున్నా.. అదేంటో సస్పెన్స్’’.. అంటూ రెండు రోజుల కిందట ఒక ట్వీట్ తో ఉత్కంఠకు తెర తీశాడు తెలంగాణ మంత్రి.. కేసీఆర్ తనయుడు కేటీఆర్. ఏంటబ్బా అంత పెద్ద న్యూస్ అంటూ అందరూ ఆసక్తిగా ఎదురు చూశారు. ఐదు రాష్ట్రాల ఎన్నికలతో పాటు పాలేరు ఉప ఎన్నిక ఫలితాలు వస్తుండటంతో దానికి సంబంధించిన న్యూస్ ఏదైనా ఉంటుందేమో అనుకున్నారు చాలామంది. ఐతే కేటీఆర్ చెప్పిన బిగ్ న్యూస్ తాను మంత్రిగా ప్రాతినిధ్యం వహిస్తున్న ఐటీ శాఖకు సంబంధించిందని ఈ రోజు అందరికీ అర్థమైంది.

యాపిల్ కంపెనీ సీఈవో టిమ్ కుక్ గురువారం హైదరాబాద్ నానక్ రామ్ గూడలోని వేవ్ రాక్ బిల్డింగ్ లోని ఆపిల్‌ కార్యాలయంలో డిజిటల్‌ మాపింగ్‌ కేంద్రాన్ని ప్రారంభించారు. దీని ద్వారా సుమారు 4 వేల మందికి ఉద్యోగాలు లభిస్తాయని కుక్ ప్రకటించారు. ఈ కార్యక్రమంలో తెలంగాణ ముఖ్యమంత్రి కేసీఆర్ తో పాటు కేటీఆర్ కూడా పాల్గొన్నారు. తమ ఉత్పత్తులైన ఐ ఫోన్ - ఐ ప్యాడ్ - మ్యాక్ - వాచ్ లపై దృష్టిపెట్టనున్నట్టు యాపిల్ సీఈవో తెలిపారు. హైదరాబాద్ లో తమ కొత్త కార్యాలయం ప్రారంభించడం చాలా థ్రిల్లింగా ఉందని కుక్ తెలిపారు.

యాపిల్ తమ కార్యాలయంకోసం హైదరాబాద్ ను ఎంచుకోవడం ఆనందంగా ఉందని కేసీఆర్ అన్నారు. యాపిల్ సంస్థ హైదరాబాద్ లో క్యాంపస్ పెట్టడం.. 4 వేల మందికి ఉద్యోగాలు కల్పించబోతుండమే కేటీఆర్ ఊరించిన బిగ్ న్యూస్ గా భావిస్తున్నారు. ఐతే కేటీఆర్ అంత సస్పెన్సులో పెట్టి వెల్లడించాల్సినంత పెద్ద న్యూసా ఇది అని జనాలు చర్చించుకుంటున్నారు. ఇది మంచి విషయమే అయినా.. కేటీఆర్ మరీ ఎక్కువ బిల్డప్ ఇచ్చారని అభిప్రాయపడుతున్నారు. ఐతే తాను చెప్పిన బిగ్ న్యూస్ ఇదే అని కేటీఆర్ ఇంకా కన్ఫమ్ చేయలేదు. మరి ఇంకేదైనా విశేషం ఉందా.. ఇదే ఆ న్యూస్ అని అంటారా అని అందరూ ఎదురు చూస్తున్నారు.