థర్డ్ క్లాస్ మాటలు మానుకో..నాలుక కోసేస్తా.. ఫైర్ బ్రాండ్ కు వార్నింగ్

తెలంగాణ రాష్ట్ర ముఖ్యమంత్రి కేసీఆర్ దత్తత గ్రామానికి వెళ్లి రెండురోజుల పాటు దీక్ష చేయటంతో పాటు.. గులాబీ బాస్ పై తీవ్ర వ్యాఖ్యలు సంధించిన రేవంత్ రెడ్డిపై విరుచుకుపడుతున్నారు గులాబీ నేతలు. తాజాగా టీఆర్ఎస్ ఎమ్మెల్యే జీవన్ రెడ్డి మరింతగా చెలరేగిపోయారు. ముఖ్యమంత్రి కేసీఆర్ ను అన్నేసి మాటలు అంటావా? అంటూ ఆయన నిప్పులు చెరిగారు.

ఓటుకు నోటు కేసులో జైలుకు వెళ్లిన రేవంత్ ఒళ్లు దగ్గర పెట్టుకొని మాట్లాడాలన్న జీవన్ రెడ్డి.. కేసీఆర్ మీద ప్రయోగిస్తున్న పరుష భాషపై కాంగ్రెస్ పార్టీ అధినేత్రి సోనియా.. రాహుల్ కు లేఖ రాస్తున్నట్లు చెప్పారు. ఇప్పటికే రేవంత్ థర్డ్ క్లాస్ మాటల్ని మానుకోవాలని హితవు పలికారు. తమ పార్టీకి చెందిన నేతలు కబ్జాలకు పాల్పడితే నిరూపించాలని.. ఆధారాలతో బయటపెట్టాలన్నారు. అంతేకానీ.. విమర్శలతో విరుచుకుపడటం సరికాదన్నారు.

కాంగ్రెస్ ముఖ్యమంత్రిగా వ్యవహరించిన వైఎస్ రాజశేఖర్ రెడ్డి ప్రగతి భవన్ నుంచే పాలన చేశారని.. అప్పుడెందుకు బహుజన పేరు పెట్టలేదని ప్రశ్నించారు. ఇప్పటికైనా రేవంత్ మాట తీరు మారాలని.. లేనిపక్షంలో ఆయన నాలుక కోస్తామన్నారు. రేవంత్ ఘాటు వ్యాఖ్యలపై గులాబీ ఎమ్మెల్యే జీవన్ రెడ్డి విమర్శలు బాగున్నా.. పలు కౌంటర్లను ఆయనకు సంధిస్తున్నారు నెటిజన్లు. రేవంత్ మాట తీరు మారాలంటున్న జీవన్ రెడ్డి.. మరి తమ పార్టీకి చెందిన మంత్రి మల్లారెడ్డి భాష గురించి ఏమిటి?

వేరే పార్టీ అధినేత్రికి మాటలు సరిగా మాట్లాడాలని లేఖ రాసే వేళలో.. తమ పార్టీకి చెందిన మంత్రి నోటికి వచ్చినట్లు మాట్లాడటమే కాదు.. పత్రికల్లో రాయలేని బూతులు తిట్టినప్పుడు.. ఆ మాటలకు అభ్యంతరం వ్యక్తం చేయాలి కదా? అని జీవన్ రెడ్డిని ప్రశ్నిస్తున్నారు. మరి.. దీనికి ఆయన ఏమని బదులిస్తారో?