స్పెషల్ ఫ్లైట్ లో గులాబీ నేతలు వెళ్లిందెక్కడికి?

తెలంగాణ అధికారపక్ష నేతలు సోమవారం చాలా బిజీబిజీగా ఉన్నారు. ముఖ్య నేతలు మొదలుకొని.. ఓ మోస్తరు నేతలంతా చలో ఫూణె అంటూ హడావుడి పడిపోయారు. హైదరాబాద్ తప్పించి.. వేరే నగరం గురించి పెద్దగా ప్రస్తావించని గులాబీ దళం ఉన్నట్లుండి ఫూణె ట్రిప్ కి వెళ్లటానికి ఒక కారణం ఉంది. పార్టీకి చెందిన పారిశ్రామికవేత్త షష్టిపూర్తి కార్యక్రమాన్ని ధూమ్ ధాంగా ఫూణెలో నిర్వహించటంతో గులాబీ నేతలంతా ఫూణె బాట పట్టారు.

పారిశ్రామికవేత్త అయిన బీబీ పాటిల్ సార్వత్రిక ఎన్నికల్లో మెదక్ జిల్లా జహీరాబాద్ ఎంపీ స్థానం నుంచి అధికారపార్టీ తరఫున పోటీ చేసి విజయం సాధించిన సంగతి తెలిసిందే. ఎంత అయినా పారిశ్రామికవేత్త.. ఆపై రిచ్.. ఇంకేముంది? తన షష్టిపూర్తి సందర్భంగా ఆయన ఫూణెలో ఒక పార్టీ నిర్వహించారు. దీనికి పార్టీ ఎంపీలు.. ఎమ్మెల్యేలు.. నేతల్ని ఆహ్వానించారు.

ఆహ్వానం ఒకటే ఇస్తే ఏం బాగుంటుంది? తన రేజం కి తగ్గట్లు స్పెషల్ ఫ్లైట్ ఏర్పాటు చేశారు. దీంతో.. సోమవారం మధ్యాహ్నం నుంచి గులాబీ దళంలో ఒకటే హడావుడి. నేతలంతా ఫూణె వెళ్లేందుకు సిద్ధం అయ్యారు. మంగళవారం మధ్యాహ్నం వరకు సాగే విందు కార్యక్రమాల్లో వారు పాల్గొననున్నారు. ఇంత పెద్ద హైదరాబాద్ వదిలేసి.. అక్కడెక్కడో ఉన్న ఫూణెలో పార్టీ చేసుకునుడు ఏందో..? పాటిల్ పుణ్యమా అని గులాబీ నేతలంతా సరదాగా కలిసి ఫూణె ట్రిఫ్ వేసే అవకాశం కలిగిందని చెప్పొచ్చు.