ఎన్నికల సిత్రాలు.. చూస్తే నవ్వాపుకోలేరు..

ఎన్నికల సిత్రాలు మొదలయ్యాయి. ఓటరును ప్రసన్నం చేసుకోవడానికి అభ్యర్థులు చిత్రవిచిత్రమైన వేశాలు వేస్తున్నారు. కొన్ని సినిమాల్లో చూపించినట్టు బయట కూడా నేతలు రెచ్చిపోతూ దిగజారుతున్నారు. మొన్నటికి మొన్న ముసలవ్వకు అన్నం తినిపించాడో అభ్యర్థి.. ఓ పిల్లాడి ముడ్డి కడిగాడో మరో అభ్యర్థి.. తాజాగా స్నానం చేస్తున్న ఓ ఓటరుపై నీళ్లు పోస్తూ ఒళ్లు రుద్దే పనికూడా చేశాడు ఓ గులాబీ అభ్యర్థి. ఇదంతా కేవలం ఎన్నికల్లో ఓట్లు పొందడానికి నేతలు పడుతున్న పాట్లు మాత్రమే.. గెలిచాక అటువైపు తిరిగి కూడా చూడరని ప్రజలు ఆడిపోసుకుంటున్నారు..

టీఆర్ ఎస్ అభ్యర్థులను ప్రకటించి నెల దాటిపోవడంతో వారంతా ప్రతి గడప తొక్కుతూ ప్రతీ ఇంటి ఇంటి ప్రచారాన్ని హోరెత్తిస్తున్నారు. ఓటరు కరుణ కోసం పడరాని పాట్లు పడుతున్నారు. ఇవన్నీ కెమెరాకు చిక్కుతుండడంతో సరదా సరదా ఫొటోలు బయటకు వస్తున్నాయి. ప్రచారం సందర్భంగా తెలంగాణ నేతలు సిగ్గులేకుండా.. ఏమాత్రం సంకోచించకుండా చేస్తున్న పనులు నవ్వులు పూయిస్తున్నాయి. ఈ వీడియోలు, ఫొటోలు సోషల్ మీడియాలో వైరల్ గా మారుతున్నాయి.

ఓట్ల కోసం తెలంగాణ నేతలు ఎన్నడూ లేని ఢ్రైనేజీలు, వీధులు శుభ్రం చేస్తూ కనిపిస్తున్నారు. ఎప్పుడూ సీరియస్ గా ఉండే వారు ప్రజల వద్దకు నవ్వు మొఖంతో వెళుతూ పలకరిస్తున్నారు. కొందరి బార్బర్ షాపుల్లో కటింగ్ చేస్తూ.. హోటల్ లలో టీ కాస్తూ చిత్ర విచిత్ర వేషాలు వేస్తున్నారు. ఇలా నేతలు చేస్తున్న కుప్పిగంతులు అందరినీ ఆశ్చర్యానికి గురిచేస్తున్నాయి. ఓట్ల కోసం చేస్తున్న ఈ పనులు మీడియాలో కూడా సంచలనంగా మారుతున్నాయి.