ట్రంప్ గారి మ‌రో దుకాణం మూత‌ప‌డింది

వివాదాస్ప‌ద వ్యాఖ్య‌ల‌కు.. దుందుడుగా వ్య‌వ‌హ‌రించే ధోర‌ణికి కేరాఫ్ అడ్ర‌స్ అయిన అమెరికా అధ్య‌క్షుడు డొనాల్డ్ ట్రంప్‌. రాజ‌కీయ వేత్త కంటే ముందే భారీగా వ్యాపారాలు చేసి.. అమెరికా ప్ర‌ముఖ పారిశ్రామివేత్త‌ల్లో ఒక‌రైన ట్రంప్‌.. త‌న విల‌క్ష‌ణ‌మైన తీరుతో ఏకంగా అమెరికాకు అధ్య‌క్షుడిగా ఎన్నిక‌య్యారు. ఇదంతా ఒక ఎత్తు అయితే.. అధ్య‌క్ష ప‌ద‌విని చేప‌ట్ట‌టానికి ముందే.. త‌న‌వ్యాపారాల్ని త‌న కుటుంబ స‌భ్యుల‌కు అప్ప‌గించిన వైనం తెలిసిందే. ఇటీవ‌ల కాలంలో ట్రంప్ ఫ్యామిలీకి చెందిన కొన్ని వ్యాపారాలు మూతేయ‌టం తెలిసిందే.

తాజాగా.. ట్రంప్ కుటుంబానికి చెందిన మ‌రో వ్యాపారం మూత‌ప‌డింది. ఆయ‌న ఫ్యామిలీకి చెందిన మోడ‌లింగ్ ఏజెన్సీ అయిన ట్రంప్ మోడ‌ల్స్ ను మూసేశారు. ఈ దుకాణాన్ని ఎందుకు మూసేశార‌న్న విష‌యంపై స్ప‌ష్ట‌త రాన‌ప్ప‌టికీ.. విశ్వ‌స‌నీయ వ‌ర్గాల స‌మాచారం ప్ర‌కారం.. ఈ మోడ‌లింగ్ కంపెనీకి స‌రైన ప్రాజెక్టులు రావ‌ట్లేద‌ని చెబుతున్నారు.

ట్రంప్ మోడ‌ల్స్ కంపెనీలో మేనేజ‌ర్ గా ప‌ని చేసే వ్య‌క్తి కంపెనీనుంచి వీడిపోయి.. వేరే కుంప‌టి పెట్టుకున్నాడ‌ని.. దీంతో.. ట్రంప్ కంపెనీలో ఉండాల్సిన మోడ‌ల్స్ జంప్ అయిపోయార‌ని.. దీంతో.. ఈ వ్యాపారాన్ని క్లోజ్ చేసినట్లుగా చెబుతున్నారు. 1999లో ట్రంప్ ఆర్గ‌నైజేష‌న్ ఈ మోడ‌లింగ్ ఏజెన్సీని ప్రారంభించింది. త‌న సంస్థ‌తో ఎంతోమంది మోడ‌ల్స్ కు పేరు ప్ర‌ఖ్యాతులు తెచ్చి పెట్టిన సంస్థ‌.. ఈ రోజు అమెరికా అధ్య‌క్ష స్థానంలో ఉన్న వేళ‌లో మూసివేయ‌టం అంద‌రి దృష్టిని ఆక‌ర్షిస్తోంది. అధికారం చేతిలో ఉంటే.. ఉన్న వ్యాపారాన్ని మ‌రింతగా పెంచే తీరుకు భిన్నంగా.. ఉన్న వ్యాపారాన్ని మూసి వేయ‌టం కాస్తంత చిత్ర‌మైన య‌వ్వార‌మే.

Like Us on Facebook : https://www.facebook.com/Tupakidotcom/