విజయవాడ రాహుల్ హత్యకేసులో కీలక ట్విస్ట్

రౌడీల ప్రాబల్యం ఎక్కువగా ఉన్న బెజవాడలో గ్రూపుల తగాదాలు తక్కువేం కాదు. ఇలాంటి గ్రూపుల్లో కోగంటి సత్యంది ఒకటి. మూడు దశాబ్దాలకు పైగా ఆయన పేరు నేర చరిత్రలో లిఖితమై ఉందంటే ఆయన ఎంతటి ఉద్దండడో అర్థం చేసుకోవచ్చు. అయితే తాజాగా మరోసారి కోగంటి సత్యం పేరు మారుమోగుతోంది. ఇటీవల విజయవాడలో ఓ యువ ఇంజనీర్ రాహుల్ హత్యకు గురయ్యాడు. ఈ కేసులో కోగంటి సత్యం పేరు ప్రధానంగా వినిపించింది.

విజయవాడలో కారులో హత్యకు గురైన రాహుల్ కేసులో కీలక పరిణామం చోటుచేసుకుంది. స్థానికంగా కలకలం రేపిన వ్యాపారి రాహుల్ హత్య కేసులో సంచలన మలుపు చోటుచేసుకుంది. రాహుల్ హత్య కేసులో ప్రధాన నిందితుడు కోరాడ విజయ్ మాచవరం పోలీసుల ఎదుట ఆదివారం లొంగిపోయాడు.

రాహుల్ హత్య కేసులో ఇప్పటికే ఎఫ్ఐఆర్ నమోదు చేసిన పోలీసులు ఏ1 కోరాడ విజయ్, ఏ2 పద్మజ, ఏ3 గాయత్రి, ఏ4 కోగంటి సత్యం పేర్లను పేర్కొన్నారు.

రాహుల్ తండ్రి రాఘవరావు స్టేట్ మెంట్ ఆధారంగా పోలీసులు పలు సెక్షన్ల కింద కేసులు నమోదు చేశారు.ఈ హత్య కేసులో ఇప్పటికే కొంతమందిని పోలీసులు అదుపులోకి తీసుకున్నారు. కోదాడ విజయ్ తో కలిపి పోలీసులు అదుపులో ఉన్న వారి సంఖ్య 6కు చేరింది. మాచవరం పోలీసుల ముమ్మర విచారణ కొనసాగుతోంది.

కోగంటి సత్యం ఎవరు..? అయన చరిత్ర ఏందని తెలుసుకునేందుకు చాలా మంది ఇంట్రెస్టు పెడుతున్నారు. 1985లో అప్పటి మంగళగిరి సర్పంచ్ ను కోగంటి సత్యం హత్య చేసినట్లు ఆరోపణలున్నాయి. అప్పటి నుంచి సత్యం భూ కబ్జాలకు పాల్పడుతూ, సెటిల్మెంట్లు చేస్తూ అక్రమ దందాలకు పాల్పడేవాడు. మంగళ గిరి నుంచి విజయవాడ కృష్ణ లంకకు మకాం మార్చిన కోగంటి ఎస్డీవీ స్టీల్స్ కంపెనీని ప్రారంభించాడు. ఓ వైపు వ్యాపార వేత్తగా ఉంటూనే మరోవైపు సెటిల్మెంట్ చేసే లీడర్ గా ఎదిగాడు. విజయవాడ మరో డాన్ వంగవీటి రంగా హత్య తరువాత కోగంటి సత్యం తన హవా సాగించాడు. ఎక్కడ చూసినా అప్పుడు కోగంటి పేరు పలికే వారు.

2008లో కాట్రగడ్డ బాబుపై కాల్పులు జరిపాడని కోగంటి సత్యంపే కేసు నమోదైంది. వాస్తవానికి కాట్రగడ్డ ప్లాన్ చేస్తే బతికి బయటపడడం అసాధ్యమంటారు. కానీ కాట్రగడ్డ తిరిగి కోగంటిపై అనేక హత్యకు ప్లాన్ వేసినా తప్పించుకున్నాడు. ఓసారి స్పైపర్ గన్ తో కాల్పులు జరిగాయి. అయినా తప్పించుకొని ప్రాణాలు కాపాడుకున్నాడు. ఓ ఫంక్షన్లోనూ ఆయనపై అటాక్ జరిగినా ఎవరికీ చిక్కలేదు.

2010లో కోగంటి సత్యంపై కోకా యాక్ట్ కింద కేసు నమోదైంది. దీంతో పోలీసులు ఆయనను నగర బహిష్కరణ చేశారు. భూవివాదంలో బోండా ఉమా, కోగంటి మధ్య జరిగిన కొన్నిగొడవల్లో అతనిపై కేసు నమోదైంది. ఇలా ఒకటి, రెండు కాకుండా కోగంటి సత్యంపై అనేక కేసులు నమోదయ్యాయి. అయినా కోగంట ఏదో విధంగా బయట హాయిగా తిరుగుతున్నాడు. తాజాగా ఆయన పేరు మరోసారి మారుమోగుతోంది.

ఇటీవల విజయవాడలో కారులో మృతదేహం లభ్యమైంది. ఈ మృతదేహం చిత్తూరు జిల్లాకు చెందిన రాహుల్ దిగా గుర్తించరు. కెనడాలో చదువు పూర్తి చేసుకున్న రాహుల్ కృష్ణ జిల్లా కొండూరు మండలం చెరువు మాధవరం లో సిలిండర్ల తయారీ కంపెనీని స్థాపించారు. ఇందులో ముగ్గురు భాగస్వాములున్నారు. బుధవారం రాత్రి 7.30 గంటల సమయంలో రాహుల్ బయటికి వెళ్లారు. ఆ తరువాత 9 గంటలకు ఇంట్లో వాళ్లు ఫోన్ చేస్తే స్విచ్ఛాఫ్ వచ్చింది.

ఇంతలో మొగల్రాజపురంలో కారులో మృతదేహం ఉన్నట్లు గుర్తించారు.పోలీసులు కారు అద్దాలు పగులగొట్టి మృతదేహాన్ని బయటకు తీశారు. అయితే రాహుల్ మెడకు ఉరి తాడు బిగించి హత్య చేసినట్లుగా పోలీసులు నిర్దారణకు వచ్చారు. తెలిసిన వాళ్లే ఈ హత్య చేసి ఉంటారని అనుమానిస్తున్నారు. ఆర్థికక లావాదేవీల విషయంలో హత్య జరిగిందనే కోణంలో విచారిస్తున్నారు. ఈ తరుణంతో కోగంటి సత్యనారాయణ తాజాగా లొంగిపోవడం ఈ కేసులో కీలక పరిణామంగా బావిస్తున్నారు.