వాళ్ల ఇళ్లల్లో రూ.100కోట్లు దొరికాయా?

ప్రముఖ సినీనటుల ఇళ్లల్లో ఐటీ శాఖ దాడులు నిర్వహించటం తెలిసిందే. తమిళ చిత్ర రంగంతో పాటు.. తెలుగు ఇండస్ట్రీలో టాక్ ఆఫ్ ద టౌన్ అయిన ఈ ఐటీ దాడులకు సంబంధించిన లోగుట్టు అంశాలు పెద్దగా బయటకు రాలేదు. తమిళ హీరో విజయ్.. హీరోయిన్లు సమంత.. నయనతారతో పాటు నిర్మాతలు.. దర్శకులు.. ఫైనాన్సియర్లు ఇలా పలువురు ఇళ్లల్లో దేశ వ్యాప్తంగా వారికున్న ఆస్తులన్నింటి మీదా ఒకేసారి దాడులు నిర్వహించటం తెలిసిందే.

విశ్వసనీయ సమాచారం ప్రకారం.. ఈ దాడుల సందర్భంగా రూ.100కోట్ల మేర ఆస్తుల వివరాలు లభించినట్లు చెబుతున్నారు.దేశవ్యాప్తంగా ఒకేసారి దాదాపు 35 చోట్ల తనిఖీలు నిర్వహించగా.. భారీగా ఆస్తులకు సంబంధించి వివరాలు తెలిపే డాక్యుమెంట్లు లభించినట్లుగా చెబుతున్నారు. వీటి విలువ రూ.100కోట్లకు పైనే ఉంటుందన్నది సమాచారం. విలువైన ఆస్తులకు సంబంధించిన డాక్యుమెంట్లను ఐటీ అధికారులు స్వాధీనం చేసుకున్నట్లు తెలుస్తోంది. మరి.. ఐటీ అధికారులకు లభించింది రూ.100కోట్ల ఆస్తులేనా? ఇంకా ఎక్కువేనా అన్నది ఇప్పుడు ప్రశ్నగా మారింది.