నవంబరు 1 నాటికి వ్యాక్సిన్ సిద్ధం..!

కరోనా మహమ్మారిని అరికట్టే వ్యాక్సిన్ కోసం ప్రపంచంలోని ప్రతి ఒక్కరు ఎంతో ఆతృతగా ఎదురుచూస్తున్నారు. దీనికోసం ఇప్పటికే ప్రపంచంలోని అగ్ర దేశాలన్నీ కూడా తీవ్రంగా శ్రమిస్తున్నాయి. ఈ తరుణంలోనే అమెరికా లో నవంబర్ 1 నాటికీ కరోనా వ్యాక్సిన్ సిద్ధం అవుతుందని ,వ్యాక్సిన్ పంపిణీకి సిద్ధంగా ఉండాలని రాష్ట్రాలను ట్రంప్ యంత్రాంగం అన్ని రాష్ట్రాలని కోరింది. డల్లాస్ ‌కు చెందిన హోల్‌ సేల్ వ్యాపారి మెక్‌ కెస్సన్ కార్ప్‌ తో ప్రభుత్వం ఒప్పందం కుదుర్చుకుంది. వ్యాక్సిన్ అందుబాటులోకి వచ్చిన తర్వాత పంపిణీ కేంద్రాల ఏర్పాటుకు అనుమతి కోరింది.

ఈ అనుమతులను పొందడానికి అవసరమైన సాధారణ సమయం.. అత్యవసర ప్రజారోగ్య కార్యక్రమం విజయవంతం కావడానికి ముఖ్యమైన అవరోధంగా నిలుస్తుందని సెంటర్ ఫర్ డిసీజ్ కంట్రోల్ అండ్ ప్రివెన్షన్ డైరెక్టర్ రాబర్ట్ రెడ్ ‌ఫీల్డ్ ఆగస్టు 27న రాష్ట్రాలకు రాసిన లేఖలో తెలిపాయి. వ్యాక్సిన్ పంపిణీకి అవసరమైన సౌకర్యాల కల్పన కోసం దరఖాస్తులను వేగవంతం చేయడానికి సీడీసీ మీ సహాయం కోరుతోందని వెల్లడించారు. అవసరాలను పరిగణనలోకి తీసుకుని నవంబర్ 1, 2020 నాటికి ఈ సౌకర్యాలు పూర్తిచేసి, సన్నద్ధంగా ఉండాలని సీడీసీ డైరెక్టర్ రాష్ట్రాలను కోరారు. వ్యాక్సిన్ విడుదలకు సంబంధించి ప్రణాళిక వివరాలను తెలియజేసే పత్రాలను రాష్ట్రాలకు అందజేసిన సీడీసీ.. అవి లైసెన్స్ పొందిన వ్యాక్సిన్‌లుగా లేదా అత్యవసర వినియోగ కింద ఆమోదిస్తామని తెలిపింది.

వ్యాక్సిన్ తొలి డోసు వేసిన కొద్ది వారాల తర్వాత బూస్టర్ డోస్ ఇవ్వనున్నట్టు ప్రకటించింది. కరోనా వ్యాక్సిన్ పంపిణీ చేసేవారికి ఎటువంటి ఖర్చు లేకుండా సహాయక సామాగ్రిని ఫెడరల్ ప్రభుత్వం సేకరించి పంపిణీ చేయనున్నట్టు వివరించింది. న్యూయార్క్, చికాగో, హ్యూస్టన్, ఫిల్‌ డెల్ఫియా, శాన్ అంటోనియోలకు కూడా ఈ లేఖను సీడీసీ పంపింది. అత్యవసర విధుల్లో పాల్గొనే సిబ్బంది, జాతీయ భద్రతా అధికారులు, సీనియర్లు, బలహీన సమూహాల సభ్యులకు ప్రాధాన్యత ఇవ్వనున్నారని న్యూయార్క్ టైమ్స్ కథనం లో వెల్లడించింది . మొత్తం మూడు వ్యాక్సిన్‌ లు అమెరికాలో ఫేజ్-3 క్లినికల్ దశలోకి ప్రవేశించాయి.