ట్రంప్ చర్య.. మదురో ప్రతిచర్య

అమెరికా అధ్యక్షుడు డొనాల్డ్ ట్రంప్ వెనుజుల వ్యవహారాలపై సీరియస్ గా స్పందించారు. ప్రతిపక్ష నేతలను నిషేధించి.. ప్రతిపక్ష పార్టీలను గడిచిన మే నెలలో పోటీచేయకుండా చేసి అడ్డదారిలో గెలిచి అరాచక పాలన చేస్తున్న వెనుజుల అధ్యక్షుడు నికోలస్ మదురోను తాము గుర్తించడం లేదని ట్రంప్ ట్వీట్ చేశారు. మదురోకు బదులుగా ప్రతిపక్ష నేత జువాన్ గైడోను వెనుజులా అధ్యక్షుడిగా గుర్తిస్తున్నట్టు స్పష్టం చేశారు. ట్రంప్ చర్యను పక్కదేశం కొలంబియా కూడా సపోర్ట్ చేసింది.

ఈ నేపథ్యంలో అమెరికా అధ్యక్షుడి చర్యపై వెనుజులా అధ్యక్షుడు మదురో ఘాటుగా స్పందించారు. ‘గెట్ అవుట్.. వెనుజుల వదిలి వెళ్లండి మాకు ఆత్మగౌరవం ఉందని’ వెనుజులాలో ఉన్న అమెరికన్ అధికారులు, ప్రజలకు అల్టీమేటం జారీ చేశారు. రాజ్యాంగబద్దంగా ఎన్నికైన అధ్యక్షుడిగా అమెరికాతో దౌత్య , రాజకీయ సంబంధాలను తెంచుకుంటున్నట్టు ప్రకటించారు. వెనుజులాను తోలుబొమ్మను చేసి అమెరికా అధికారం చెలాయించాలని చూస్తోందని ఘాటుగా విమర్శించారు. ట్రంప్ చర్య.. మదురో ప్రతిచర్యతో రెండు దేశాల మధ్య ఉద్రిక్తతలు పెరిగాయి.