నాలుగు గంటలకో సినిమా రిలీజ్ అవుతోందట

రోటీన్ గా సాగిపోతున్నట్లుగా ఉంటాయి కానీ కొన్ని విషయాల్ని చూస్తే.. నిజమా? అన్నట్లుగా అనిపిస్తాయి. వారంలో మిగిలిన రోజుల సంగతి ఎలా ఉన్నా.. శుక్రవారం వస్తే చాలు మూవీ లవ్వర్స్ కు పండగే. ఏ వారానికి ఆ వారం సరికొత్తగా ముస్తాబు అవుతూ.. థియేటర్లలో సందడి చేసే కొత్త సినిమాలు తీసుకొచ్చే ఉత్సాహం అంతాఇంతా కాదు.

ఇక.. స్టార్ హీరోల సినిమా రిలీజ్ అంటే చాలు.. వారి అభిమానులకు అదో పండగగా మారిపోతుంది. ఒకవేళ ఏదైనా సినిమా సూపర్ హిట్ అయితే చాలు.. సినీ ప్రేమికులంతా మిగిలిన విషయాల్ని వదిలేసి.. ఆ సినిమా చూసేందుకు పోటెత్తే పరిస్థితి. సినిమా రిలీజ్ ముచ్చట ఇలా ఉన్నా.. ఏడాది మొత్తంలో రిలీజ్ అయ్యే సినిమాలు ఎన్ని అని అడిగితే.. నిత్యం సినిమాలు చూసే సినిమా అభిమాని సైతం లెక్కలు చెప్పలేని పరిస్థితి.

కానీ.. ఈ లెక్క వింటే విస్మయాన్ని కలిగించటం ఖాయం. ఏడాది పొడువునా భారతీయ భాషల్లో విడుదలయ్యే అన్ని సినిమాల్ని చూస్తే.. దాదాపు 2వేలు దాటతాయని కేంద్రమంత్రి వెంకయ్యనాయుడు సెలవిచ్చారు. అంతేనా.. ఏడాదిలో విడుదలయ్యే సినిమాల్ని గంటల చొప్పున లెక్కలు తీస్తే.. ఊహించని ఆన్సర్ వస్తోంది. ప్రతి నాలుగు గంటల వ్యవధిలో ఒక సినిమా విడుదల అవుతున్నట్లుగా వెల్లడించారు. శుక్రవారం అయితేనే సినిమా పండగ అనుకుంటాం. కానీ.. దేశ వ్యాప్తంగా విడుదలయ్యే సినిమాల లెక్కను ఏడాదిలోని గంటలతో లెక్క వేస్తే.. సరాసరిన నాలుగు గంటలకు ఒక సినిమా విడుదల అవుతున్నట్లుగా చెప్పిన ఆయన ఈ లెక్క తనను ఆశ్చర్యపరిచిందని చెబుతూ.. అందరిని ఆశ్చర్యపోయేలా చేశారు వెంకయ్య.

Like Us on Facebook : https://www.facebook.com/Tupakidotcom/