ఏకంగా గాంధీతోనే పోల్చి ఫ్లెక్సీ పెట్టేశారు

అభిమానం ఉండటం తప్పు లేదు. కానీ.. ఆ పేరుతో ఇష్టారాజ్యంగా వ్యవహరించటం సరికాదు. ప్రేమాభిమానాలు ఉన్నాయి కదా అని ఎవరితో పడితే వారితో పోలిస్తే బాగోదు. హద్దులు దాటే అభిమానం ప్రదర్శిస్తే లేని పోని తలనొప్పులు ఖాయం. ప్రస్తుతం ప్రధాని మోడీ మీద అభిమానం ప్రదర్శిస్తూ బీజేపీ నేత ఒకరు ఏర్పాటు చేసిన ఫ్లెక్సీ ఇప్పుడు విమర్శల సెగ పుట్టిస్తోంది.

ఐర్లాండ్.. అమెరికా పర్యటన సక్సస్ అయి ఎంజాయ్ చేస్తున్న బీజేపీ వర్గాలు సైతం.. తాజాగా ఏర్పాటుఅయిన ఫ్లెక్సీ చూసి షాక్ తింటున్నారు. ఎందుకంటే.. జాతిపిత మహాత్మ గాంధీతో మోడీని పోలుస్తూ ఫ్లెక్సీ వెలవటమే దీనికి కారణం.

ఢిల్లీకి చెందిన స్థానిక బీజేపీ నేత విజయ్ గోయల్ ఈ ఫ్లెక్సీని ఏర్పాటు చేశారు. సబర్మతీ మహాత్ముడు అంటూ గాంధీజీ.. మోడీ ఫోటోలు అచ్చేసి పోస్టర్ తయారు చేయించి పెట్టించేశారు. దీనిపై విజయ్ గోయిల్ మాట్లాడుతూ.. తాను ఏర్పాటు చేసిన ఫ్లెక్సీని సమర్థించుకున్నారు.

గాంధీజీ చేసిందని చెప్పానని.. అదే విధంగా ప్రధాని మోడీ చేసింది చెప్పానని.. ఇద్దరూ సబర్మతి నుంచే వచ్చారని.. గాంధీజీ నడిపిన బాటలోనే ప్రధాని మోడీ నడుస్తున్నారంటూ వ్యాఖ్యానించారు. అమెరికా పర్యటన సక్సెస్ ఫుల్ గా పూర్తి కావటంపై ఎంజాయ్ చేస్తున్న కమలనాథులకు తాజా పోస్టర్ కొత్త తలనొప్పులు తేవటం ఖాయమన్న మాట వినిపిస్తోంది.