ఎన్నికలకు రెడీగా ఉండండి..: విజయసాయి రెడ్డి

అక్టోబర్ 17 తేదీకి రెండు మూడు రోజులు అటూ ఇటుగా స్థానిక ఎన్నికల నోటిఫికేషన్ వచ్చే అవకాశం ఉందని ప్రకటించారు వైఎస్సార్ కాంగ్రెస్ పార్టీ ఎంపీ వి.విజయసాయి రెడ్డి. స్థానిక ఎన్నికలకు పార్టీ శ్రేణులు రెడీగా ఉండాలని అంటూ ఆయన ఆ ప్రకటన చేశారు.

అన్నీ కుదిరితే అక్టోబర్ పదిహేడో తేదీన స్థానిక ఎన్నికల నోటిఫికేషన్ వస్తుందని అన్నారు. కాస్త లేట్ అనుకుంటే ఆ తర్వాత రెండు మూడు రోజుల వ్యవధిలో ఎన్నికల నోటిఫికేషన్ విడుదల అవుతుందని విజయసాయి రెడ్డి అన్నారు.

స్థానిక ఎన్నికల్లో భాగంగా ముందుగా పంచాయతీ - జడ్పీటీసీ-ఎంపీటీసీ ఎన్నికలు జరుగుతాయని అన్నారు. ఆ వెంటనే మున్సిపాలిటీ - కార్పొరేషన్ ఎన్నికలు ఉంటాయని విజయసాయి రెడ్డి ప్రకటించారు.

ఈ మేరకు ఎన్నికలకు రెడీగా ఉండాలని అయన అన్నారు. స్థానిక ఎన్నికల ప్రక్రియ డిసెంబర్ నెలాఖరు కళ్లా ముగుస్తుందని అన్నారు. అన్ని ఎన్నికలూ ఈ ఏడాది చివరకు పూర్తి అవుతాయని ప్రకటించారు.

మొత్తానికి ఎప్పుడెప్పుడా అని చాలా మంది ఎదురుచూస్తున్న ఎన్నికల గురించి విజయసాయి రెడ్డి ఈ ప్రకటన చేశారు. ఇప్పటికే స్థానిక సంస్థల ఎన్నికలు ఎప్పుడో జరగాల్సింది. అయితే తన టర్మ్ చివరలో ఈ ఎన్నికలను నిర్వహించడానికి చంద్రబాబు నాయుడు ధైర్యం చేయలేదు. దీంతో అప్పుడు ఎన్నికలు వాయిదా పడ్డాయి. ఈ ఎన్నికలను నిర్వహించడానికి జగన్ ప్రభుత్వం రెడీగా కనిపిస్తోంది.