వైఎస్సార్ కాంగ్రెస్ పార్టీ శ్రేణులకు విజయసాయి రెడ్డి హితబోధ!

ఎన్నికల సంగ్రామంలో ట్విటర్లో అత్యంత యాక్టివ్ గా ఉంటూ ప్రత్యర్థుల మీద ధ్వజమెత్తుతూ వచ్చిన వైఎస్సార్ కాంగ్రెస్ పార్టీ ఎంపీ వి.విజయసాయిరెడ్డి ఫలితాల తర్వాత కూడా సోషల్ మీడియా ద్వారా స్పందిస్తూ ఉన్నారు. విజయం మీద విర్రవీగేలా కాకుండా.. విజయసాయి రెడ్డి ఆసక్తిదాయకంగా స్పందిస్తూ ఉన్నారు. వైఎస్సార్ కాంగ్రెస్ పార్టీ ఏపీలో ఘన విజయం సాధించిన నేపథ్యంలో కూడా ఎక్కడ గర్వం వద్దని ఆయన తమ పార్టీ శ్రేణులకు చెబుతూ ఉన్నారు. ఈ మేరకు ఒక ట్వీట్ పెట్టారాయన.

''ప్రజల దీవెనతో సాధించిన ఈ ఘన విజయంతో వైఎస్సార్ కాంగ్రెస్ కార్యకర్తల బాధ్యత పెరిగింది. ఐదేళ్ల నారాసుర పాలనలో మీరు ఎన్నో ఇబ్బందులు పడ్డారు. అందులో నుంచి పుట్టిన కసిని జగనన్నను మరింత బలోపేతం చేయడానికి ఉపయోగించాలి. మాటకు మాట - ప్రతీకారాలు మనకు - వాళ్లకు తేడా లేకుండా చేస్తాయి.'' అని విజయసాయి రెడ్డి ఒక ట్వీట్ పెట్టారు.

ఇక రైతుల్లో కూడా ఆశాభావం కలిగించేలా విజయసాయి రెడ్డి ఒక ట్వీట్ పెట్టారు. ''కరువు వల్ల నష్టాల్లో కూరుకుపోయిన రైతులు ధైర్యంగా ఉండాలి. జగనన్న ప్రభుత్వం వచ్చింది. రెయిన్ గన్ల ఉత్తుత్తి ప్రచారాలు కాకుండా కరువు నివారణకు శాశ్వత పరిష్కారాలు ఉంటాయి. సేద్యం పండుగలా మారే రోజులొచ్చాయి. ఇకపై మంచి నీటి సమస్య అనేది లేకుండా ఆయన ముందస్తు ప్రణాళికలు అమలు చేయిస్తారు.'' అని రైతులకు భరోసాను ఇస్తూ ఆయన ట్వీట్ చేశారు.