ఏపీ ప్ర‌యోజ‌నాలే మాకు ముఖ్య‌మ‌న్న విజ‌య‌సాయి

కాస్తంత ప్ర‌జాద‌ర‌ణ ఉంటే చాలు.. జాతీయ రాజ‌కీయం వైపు చూసే నేత‌లు ఉన్న కాల‌మిది. కోట్లాది మంది ప్ర‌జ‌లు వెంట ఉన్నా.. తాను తీసుకున్న సంక‌ల్పానికి త‌గిన‌ట్లుగా ఏపీ ప్ర‌యోజ‌నాలు.. ఏపీ అభివృద్ధి మాత్ర‌మే వైఎస్సార్ కాంగ్రెస్ పార్టీ అధినేత వైఎస్ జ‌గ‌న్మోహ‌న్ కు ముఖ్య‌మ‌ని స్ప‌ష్టం చేశారు ఆ పార్టీ ఎంపీ విజ‌య‌ సాయిరెడ్డి.

ప్ర‌జా సంక‌ల్ప యాత్ర పేరుతో పాద‌యాత్ర చేస్తున్న వైఎస్ జ‌గ‌న్మోహ‌న్ రెడ్డికి సంఘీభావంగా విజ‌య‌సాయి రెడ్డి పాద‌యాత్ర చేస్తున్నారు. ప్ర‌స్తుతం జ‌గ‌న్ పాద‌యాత్ర ప‌శ్చిమ‌గోదావ‌రి జిల్లాలో సాగుతోంది. జ‌గ‌న్ పాద‌యాత్ర‌కు ప్ర‌జ‌లు పోటెత్తుతున్నారు. ఇదిలా ఉంటే.. జ‌గ‌న్ ను ఏపీ ముఖ్య‌మంత్రిగా చూడాల‌ని ప్ర‌జ‌లు కోరుకుంటున్న‌ట్లుగా విజ‌య‌సాయిరెడ్డి వెల్ల‌డించారు. రాష్ట్రాన్ని దోచుకుంటున్న టీడీపీ పాల‌న‌కు చ‌ర‌మ‌గీతం పాడాల‌ని భావిస్తున్నార‌ని పేర్కొన్నారు.

ఏపీలో కుటుంబ పాల‌న సాగుతుంద‌ని మండి ప‌డిన విజ‌య‌సాయి రెడ్డి .. ఎన్నిక‌ల‌కు ముందు బాబు ఇచ్చిన హామీల్లో ఏ ఒక్క‌టి నెర‌వేర్చ‌లేద‌న్నారు. త‌మ‌కు జాతీయ రాజ‌కీయాల‌పై ఆస‌క్తి లేద‌ని.. త‌మ దృష్టి మొత్తం ఏపీనేన‌ని స్ప‌ష్టం చేశారు. ఏపీ ప్ర‌యోజ‌నాలు.. ఏపీ అభివృద్ధి మీద‌నే తాము దృష్టి పెడ‌తామ‌ని.. ఏపీని అభివృద్ధి చేయ‌ట‌మే ల‌క్ష్య‌మ‌న్నారు.