కోహ్లీ గడ్డానికి ఇన్సూరెన్సా?

భారత క్రికెట్ జట్టు కెప్టెన్ విరాట్ కోహ్లి కొన్నేళ్లుగా గడ్డంతో కనిపిస్తున్న సంగతి తెలిసింది. మిగతా భారత క్రికెటర్లలో కూడా చాలామంది గడ్డాలు పెంచారు. కొన్నిసార్లు తీసేస్తున్నారు. మళ్లీ పెంచుతున్నారు. కానీ కోహ్లి మాత్రం ఎప్పుడూ గడ్డంతో కనిపిస్తున్నాడు. తాను గడ్డం తీసే ప్రసక్తే లేదని ఇటీవలే స్పష్టం చేశాడు కూడా. ఈ ఏడాది ఐపీఎల్ సందర్భంగా 'బ్రేక్ ద బియర్డ్' ఛాలెంజ్ ఎంతో పాపులర్ అయింది. చాలా మంది క్రికెటర్లు ఈ ఛాలెంజ్‌ స్వీకరించి గడ్డం తీసేసి ఒకరి తర్వాత మరొకరికి ఛాలెంజ్‌ విసురుకున్నారు. కానీ కోహ్లీ మాత్రం తాను గడ్డం తీయలేనని తేల్చేశారు. అతనిలా చెప్పడంలో సీక్రెట్ ఏంటో యువ క్రికెటర్ కేఎల్ రాహుల్ వెల్లడించాడు.

దీనికి సంబంధించి ఓ వీడియోని రాహుల్ తన ట్విట్టర్‌ పేజీలో పోస్ట్ చేశాడు. '‘నీ గడ్డం నిన్ను బాగా విసిగిస్తుందని నాకు తెలుసు. నీ గడ్డానికి ఇన్సూరెన్స్ తీసుకున్నావన్న ఈ వార్త నేను చెప్పిన విషయాన్ని నిజం చేసింది' అంటూ రాహుల్ కామెంట్ పెట్టాడు. ఈ వీడియోలో విరాట్ కోహ్లి గడ్డానికి సంబంధించి ఓ వ్యక్తి కొలతలు తీసుకుంటుంటే.. మరో వ్యక్తి అతడిని ఫొటోలు తీయడాన్ని చూడొచ్చు. దీన్ని బట్టి చూస్తుంటే రాహుల్ మాటల్లో ఆంతర్యమేదో ఉందని స్పష్టమవుతోంది. మరి నిజంగా గడ్డానికి ఇన్సూరెన్స్ తీసుకోవడం ఉంటుందా అన్నది సందేహం. ఇంతకీ కోహ్లి గడ్డం కొలతలు.. ఫొటోలు తీయడంలో అసలు ఉద్దేశం ఏమిటి?