కేటీఆర్‌ ను పొగిడేసిన‌ బాలీవుడ్ హీరో

తెలంగాణ రాష్ట్ర ఐటీ మంత్రి కే తారకరామారావు పేజ్ త్రీ సెల‌బ్రిటీల నుంచి ప్ర‌శంస‌లు పొంద‌డంలో ముందుంటున్నార‌నేది అంద‌రికీ తెలిసిందే. ఇది తెలుగు సినిమా వ‌ర‌కే ప‌రిమితం కాలేదు. కేటీఆర్ ప్ర‌భ ఇపుడు బాలీవుడ్‌ కు కూడా చేరింది. పుర‌పాల‌క మంత్రి కూడా అయిన కేటీఆర్ కొత్త‌ ఇంటికి అనుమతి పొందాలంటే మొక్కలు నాటడం తప్పనిసరి చేయాలన్న ప్రతిపాదనకు బాలీవుడ్ హీరో వివేక్ ఒబెరాయ్ కితాబిచ్చారు.

రెండోవిడత హరితహారం సందర్భంగా మంత్రి కేటీఆర్ తన ట్విట్టర్ ''అకౌంట్ లో ఇంటి నిర్మాణానికి అనుమతులు పొందాలంటే తప్పనిసరిగా కొన్ని మొక్కలు నాటాలనే నిబంధన తేవాలని అనుకుంటున్నాం. నీటిని పొదుపుచేయడంతో పాటు ఈ నిబంధన కూడా పెట్టాలని ఆలోచన చేస్తున్నాం''అంటూ ట్వీట్ చేశారు. ఈ ట్వీట్‌ కు సోషల్ మీడియా భారీ స్పందన‌లే వ‌చ్చాయి. ఈ స్పంద‌నల్లో వివేక్ ఒబెరాయ్ ఒక‌రు 'రామ్ అన్నా.. మీ నిర్ణయం అద్భుతమైనదే కాకుండా అభివృద్ధికి దారులు వేసేది కూడా. మీకు మరింత శక్తి లభించాలని కోరుకుంటున్నాను. ఈ నిర్ణయం తప్పనిసరి చేయడం ద్వారా కాంక్రీట్ అడవిగా మారిపోయిన మన నగరం ఆకుపచ్చగా మారుతుంది' అని సంతోషం వ్యక్తం చేస్తూ రీట్వీట్ చేశారు. దీనికి స్పందించిన మంత్రి కేటీఆర్ 'థ్యాంక్యూ వివేక్ మీ స్పంద‌న ప్ర‌శంస‌నీయం' అంటూ రీట్వీట్ చేశారు.