కేటీఆర్ ట్వీట్.. బాలీవుడ్ మీరో ఎగ్జైట్ మెంట్

హైదరాబాద్ లో అపాచీ హెలికాఫ్టర్ల తయారీ కోసం ప్రతిష్టాత్మక బోయింగ్ - టాటా అడ్వాన్స్డ్ సిస్టమ్స్ సంస్థలు జాయింట్ వెంచర్ ప్రారంభిస్తున్నట్లు తెలంగాణ ఇన్ఫర్మేషన్ టెక్నాలజీ శాఖా మంత్రి కె.తారకరామారావు నిన్న వెల్లడించిన సంగతి తెలిసిందే. దీనిపై తెలంగాణ ప్రజల్లో సంతోషం వ్యక్తమవుతోంది. ఐతే తెలంగాణ ప్రజల కంటే కూడా ఓ బాలీవుడ్ హీరో ఈ ప్రాజెక్టు మీద ఎక్కువ ఎగ్జైట్ అయిపోయాడు. అతనెవరో కాదు.. వివేక్ ఒబెరాయ్.

అపాచీ హెలికాఫ్టర్ల తయారీ గురించి కేటీఆర్ పెట్టిన ట్వీట్ పై వివేక్ స్పందించాడు. ‘‘సూపర్ ఇంప్రెసివ్ రామ్ అన్నా’’ అని ట్వీట్ మొదలు పెట్టి.. ‘‘మీరు చేస్తున్న ప్రయత్నాల వల్ల హైదరాబాద్ హ్యాపెనింగ్ మాత్రమే కాదు.. టెర్రిఫిక్ తెలంగాణ సాధ్యమవుతోంది’’ అని ట్వీట్ ముగించాడు వివేక్. దీనిపై కేటీఆర్ కూడా స్పందించాడు. ‘‘వివేక్ భాయ్ థ్యాంక్స్. మా హైదరాబాదీ ఒబెరాయ్ సాబ్ ఏం చేస్తున్నారు’’ అని ట్వీట్ పెట్టాడు.

వివేక్ ఒబెరాయ్ ఫ్యామిలీది హైదరాబాదే. ఐతే వివేక్ తండ్రి సురేష్ ఒబెరాయ్ బాలీవుడ్ లో మంచి పేరు సంపాదించి అక్కడే సెటిలైపోయారు. పరిటాల రవి జీవిత కథ స్ఫూర్తితో తెరకెక్కిన ‘రక్తచరిత్ర’ సినిమాలో వివేక్ నటించిన సంగతి తెలిసిందే.