విశాఖలో మళ్లీ డ్రగ్స్ కలకలం..ఆ విద్యార్థులే టార్గెట్ !

విశాఖపట్నం లో మరోసారి డ్రగ్స్ కలకలం రేగింది. స్టూడెంట్స్ ను టార్గెట్ గా చేసుకొని మాదక ద్రవ్యాల‌ ముఠా చెలరేగిపోతోంది. తాజాగా తెన్నేటి పార్కు సమీపంలో వర్మరాజు అనే యువకుడిని అరిలోవ పోలీసులు అరెస్టు చేశారు. అతని వద్ద నుండి 5 ఎల్‌ ఎల్‌ బ్లాట్స్‌, 200 మిల్లీగ్రాముల MDMA, 200 గ్రాముల గంజాయి, ఓ బైక్‌ ను స్వాధీనం చేసుకున్నారు. అరెస్ట్ చేసిన వర్మరాజు సివిల్ ఇంజినీరింగ్‌ చేసినట్టు పోలీసులు తెలిపారు. ఫ్రెండ్ నుండి వర్మరాజు డ్రగ్స్‌ తీసుకున్నట్లు పోలీసులు గుర్తించారు. వర్మరాజు స్నేహితులను కూడా విశాఖ పోలీసులు ప్రశ్నిస్తున్నారు.హైదరాబాద్‌ నుంచి డ్రగ్స్‌ దిగుమతి చేస్తున్నట్లు విశాఖ ఏసీపీ మూర్తి తెలిపారు.

ఓ గ్యాంగ్ కాలేజీ విద్యార్థులకు ఈ డ్రగ్స్ విక్రయిస్తున్నట్లు తెలిసిందని, అలాగే వారి కోసం గాలిస్తున్నట్లు తెలిపారు. త్వరలోనే వారిని అదుపులోకి తీసుకుంటామని అన్నారు. విశాఖలో చాలా రోజులుగా ఈ ముఠా ఇంజినీరింగ్ విద్యార్థులే టార్గెట్‌గా డ్రగ్స్ దందా చేస్తున్నట్లు పోలీసులు గుర్తించారు. తల్లిదండ్రులు తమ పిల్లలపై ఓ కన్నేసి ఉంచాలని పోలీసులు హెచ్చరిస్తున్నారు. గత కొన్ని రోజుల క్రితమే సెక్స్ రాకెట్ ముఠాను పోలీసులు అరెస్ట్ చేయగా.. తాజాగా డ్రగ్స్ దందా కలకలం రేపింది. దీనితో పోలీసులు విశాఖ నగరంపై మరింత నిఘా పెంచారు. కొద్దిరోజులుగా ఈ డ్రగ్స్ గ్యాంగ్ ‌లు పూర్తిగా సైలెంట్ అయ్యాయి. మళ్లీ ఇప్పుడు డ్రగ్స్ బయటపడటం కలకలం రేపుతోంది.