నకిలీ కరోనా సృష్టి.. వ్యాక్సిన్ పరిశోధనలో ముందడుగు

కరోనాను నియంత్రించేందుకు ఇప్పుడు ప్రపంచవ్యాప్తంగా వ్యాక్సిన్ లు తయారవుతున్నాయి. ఇప్పుడిప్పుడే దాని గురించి శాస్త్రవేత్తలకు అసలు నిజాలు తెలుస్తున్నాయి. అయితే బయో సేఫ్టీ లేకుండా ఈ వైరస్ పై పరిశోధనలు చేస్తే శాస్త్రవేత్తలకు కూడా ఈ వైరస్ సోకుతుంది. అలా ప్రపంచవ్యాప్తంగా చాలా మందికి అంటింది కూడా. అందుకే ఈ వ్యాక్సిన్ పరిశోధనల్లో జాప్యం జరుగుతోంది.

దీంతో వాషింగ్టన్ యూన్సివర్సిటీ స్కూల్ ఆఫ్ మెడిసన్ శాస్త్రవేత్తలు దీనికి విరుగుడు కనిపెట్టారు. అచ్చం కరోనా వైరస్ మాదిరిగానే కణాల్లోకి చొరబడి యాంటీ బాడీలతో చర్యలు జరిపే నకిలీ కరోనా వైరస్ ను అభివృద్ధి చేశారు. ఈ కృత్రిమ వైరస్ తో ఏ రకమైన వ్యాధి వ్యాపించదు. కరోనా వైరస్ నుంచి వేరు చేసిన ఒక జన్యువును నిరుపయోగమైన ఒక వైరస్ లోకి జొప్పిచడం ద్వారా ఈ హైబ్రిడ్ వైరస్ తయారైంది.

ఇది వ్యాధిని కలుగజేయదు కాబట్టి శాస్త్రవేత్తలంతా ఇప్పుడు ఈ నకిలీ వైరస్ పై పరిశోధనలు చేస్తున్నారు. జన్యుమార్పులు గుర్తించి వ్యాక్సిన్ తయారీకి ముందడుగు వేస్తున్నారు. ఈ కొత్త నకిలీ వైరస్ అచ్చం కరోనాలాగానే వ్యవహరిస్తోందని... కానీ వ్యాధిని మాత్రం కలిగించడం లేదు.

కరోనా నుంచి కోలుకున్న వ్యక్తుల యాంటీ బాడీలు ఈ నకిలీ కరోనా వైరస్ ను గుర్తించినట్టు ప్రయోగాల్లో తేలింది. దీంతో ఈ నకిలీ వైరస్ ను ప్రపంచదేశాల శాస్త్రవేత్తలకు సరఫరా చేసి కరోనాపై ముందుడుగు వేస్తున్నారు శాస్త్రవేత్తలు.