లోకేష్ ఎక్కడున్నారు? ఏం జరుగుతోంది?

ఒకవైపు ఎన్నికల సమయం ఆసన్నం అయ్యింది. ఇలాంటి నేపథ్యంలో పార్టీ శ్రేణులను కలుపుకుని పోవడం, వారిని కలుస్తూ వారిలో ఉత్సాహాన్ని నింపడం - వీలైనంత ఎక్కువ మందిని కలవడం.. వారిలో పార్టీ కోసం పని చేసే స్ఫూర్తి నింపడం.. ఇదీ రాజకీయ నేతల పని! ప్రత్యేకించి అధినాయకత్వం లెవల్లో ఉన్న వాళ్లు ఈ విషయంలో చాలా ఉత్సాహంగా ఉండాలి!

అయితే తెలుగుదేశం పార్టీలో మాత్రం ఒకింత భిన్నమైన పరిస్థితి కనిపిస్తూ ఉంది. అందులో ముఖ్యమైనది ఏమిటంటే.. నారా లోకేష్ బాబు అస్సలు కనిపించడం లేదు! ఈ విషయంలో వైఎస్సార్ కాంగ్రెస్ పార్టీ వాళ్లు ఎద్దేవా చేసేంత వరకూ వచ్చింది పరిస్థితి. ‘ఇంతకీ నారా లోకేష్ బాబు ఎక్కడ?’ అని వైఎస్ ఆర్ కాంగ్రెస్ పార్టీ వాళ్లు ప్రశ్నిస్తున్నారంటే పరిస్థితిని అర్థం చేసుకోవచ్చు.

నారా లోకేష్ మీడియాకు కనపడి కూడా చాలా కాలం అయ్యింది. ఇంతకీ లోకేష్ ఎక్కడ? అంటే.. ట్విట్టర్లో అని చెప్పుకోవాల్సి వస్తోంది. అనుదినం ట్వీట్ల విషయంలో మాత్రం లోకేష్ వెనుకడుగు వేయడం లేదు. రోజూ ఏదో ఒక ట్వీట్ పెడుతూనే ఉన్నారు. ఆ ట్వీట్ తో జగన్ ను - మోడీని - కేసీఆర్ ను లక్ష్యంగా చేసుకొంటూ ఉన్నారు. వారందరినీ కలిపి తిడుతున్నారు.

రాజకీయంలో ట్వీట్లు కూడా ఇంపార్టెంటే కానీ.. ట్వీట్లు మాత్రమే రాజకీయం కాదు అనే విషయం వేరే చెప్పనక్కర్లేదు. లోకేష్ ఇప్పుడు పెట్టాల్సింది ట్వీట్లు కాదని.. నాయకుడిగా శ్రేణులను సమరాన్ని సన్నద్ధం చేయాలని పరిశీలకులు వ్యాఖ్యానిస్తున్నారు. ‘లోకేష్ భయపడి బయటకు కూడా రావడం లేదు..’ అని ప్రతిపక్ష పార్టీ వాళ్లు అనే పరిస్థితి తలెత్తాల్సింది కానీ వారు వ్యాఖ్యానిస్తున్నారు.

ఈ విషయం గురించి తెలుగుదేశం నేతల వద్ద ఆరా తీస్తే.. లోకేష్ రెడీ గా ఉన్నారని, ప్రచారానికి కూడా సిద్ధం అవుతున్నారని, చంద్రబాబు నాయుడు ప్రచారం ఈ నెల పదహారు నుంచి ప్రారంభం అవుతుండగా, అదే రోజున లోకేష్ కూడా ప్రచారం మొదలుపెడతారని.. చంద్రబాబు ఒక దిక్కున ప్రచారం చేస్తే మరో దిక్కులో లోకేష్ ప్రచారం సాగుతుందని వారు చెబుతున్నారు!