రాహుల్ స‌భకు ఆ ముగ్గురు ఎందుకు రాలేదు?

ఏఐసీసీ అధ్య‌క్షుడు రాహుల్ గాంధీ మంగ‌ళ‌వారం నాడు క‌ర్నూలులో పర్య‌టించిన సంగతి తెలిసిందే. స్థానిక కాలేజీలో నిర్వ‌హించిన బ‌హిరంగ స‌భ‌లో రాహుల్ ప్ర‌సంగించారు. రాహుల్ స‌భ‌కు జ‌నం కూడా భారీగానే హాజ‌ర‌య్యారు. 40 నిమిషా పాటు ప్ర‌సంగించిన రాహుల్...ప్ర‌ధాని మోదీపై - బీజేపీ ప్ర‌భుత్వంపై విరుచుకుప‌డ్డారు. రాష్ట్రం ఎదుర్కొంటోన్న స‌మ‌స్య‌ల‌కు బీజేపీ విధానాలే కార‌ణ‌మ‌ని మండిప‌డ్డారు. త‌మ పార్టీ అధ్య‌క్షుడి మీటింగ్ కోసం కాంగ్రెస్ ముఖ్య నేత‌లంతా హాజ‌ర‌య్యారు. అయితే, ఈ స‌భ‌కు కాంగ్రెస్ కు చెందిన ముగ్గురు కీల‌క‌మైన నేత‌లు హాజ‌రుకాక‌పోవ‌డం చ‌ర్చ‌నీయాంశ‌మైంది. ప‌ల్లం రాజు - వ‌ట్టి వ‌సంత్ - చిరంజీవిలు రాహుల్ స‌భ‌కు డుమ్మా కొట్ట‌డంపై కాంగ్రెస్ శ్రేణులు చ‌ర్చించుకుంటున్నాయి.

రాహుల్ స‌భ‌కు కోట్ల విజ‌య భాస్క‌ర్ రెడ్డి - కిర‌ణ్ కుమార్ రెడ్డి - బైరెడ్డి రాజ‌శేఖ‌ర్ రెడ్డి - వంటి నేత‌లు హాజ‌ర‌య్యారు. అయితే, ఈ స‌భ‌కు ఆ ముగ్గురు నేత‌లు రాలేదు. కొంత‌కాలంగా రాజ‌కీయాల్లో చురుగ్గా లేని ఆ ముగ్గురు ఈ స‌భ‌కు కూడా రాక‌పోవ‌డం పై చ‌ర్చ జ‌రుగుతోంది. అయితే, ఈ ముగ్గురు ఇంకా కాంగ్రెస్ లోనే కొన‌సాగుతున్న‌ప్ప‌టికీ ఈ స‌భ‌కు రాక‌పోవ‌డంపై భిన్నాభిప్రాయాలు వ్య‌క్త‌మ‌వుతున్నాయి. వారింకా రాజీనామా చేయ‌లేద‌ని..ఈ స‌భ‌కు డుమ్మా కొట్టి వేరే పార్టీలో చేర‌బోతున్నామ‌నే సంకేతాలిస్తున్నార‌నే విమ‌ర్శ‌లు వ‌స్తున్నాయి. అయితే, చిరు సినిమాల్లో బిజీగా ఉన్నారు కాబ‌ట్టి ఈ స‌భ‌కు హాజ‌రు కాలేక‌పోయి ఉండ‌వ‌చ్చ‌ని...ప‌ల్లం రాజు - వ‌సంత్ లు వేరే పార్టీలోకి జంప్ అవుతారేమోన‌ని కొంద‌రు అభిప్రాయ‌ప‌డుతున్నారు.