'ఆర్ఆర్ఆర్'కు మరో 'ఆర్'యాడ్ కానుందా? సెంటిమెంట్ రిపీట్?

మునుగోడు ఉప ఎన్నిక పక్కా అన్న విషయంపై క్లారిటీ వచ్చిన నేపథ్యంలో.. ఇప్పుడు తెలంగాణ రాజకీయం మొత్తం మునుగోడు చుట్టూ తిరుగుతోంది. పైకి ఒక ఉప ఎన్నికగా కనిపిస్తున్నా.. తెర వెనుక మాత్రం చాలానే లెక్కలు తెర మీదకు వస్తున్నాయి. ఇలాంటివేళ.. కాంగ్రెస్ కు గుడ్ బై చెప్పేసి.. కమలం పార్టీలో చేరేందుకు కోమటిరెడ్డి రాజగోపాల్ రెడ్డి సిద్ధం కావటం.. అందుకు తగ్గ ముహుర్తాన్ని డిసైడ్ చేసిన వేళ.. ఇప్పుడు అందరి చర్చ ఉప ఎన్నిక ఫలితం చుట్టూ సాగుతోంది.

ఎన్నిక ఏదైనా.. బరిలోకి దిగే ప్రతి ఒక్కరి నోటి నుంచి గెలుపు మాటే వినిపిస్తూ ఉంటుంది. ప్రధాన పార్టీల అభ్యర్థులైతే.. తగ్గేదెలే అన్నట్లే మాట్లాడతారు కానీ.. వాస్తవిక కోణంలో మాట్లాడేవారు తక్కువగా కనిపిస్తుంటారు. మునుగోడు విషయానికి వస్తే.. తాజా ఉప ఎన్నికల్లో తమ గెలుపు ఖాయమన్న ధీమాను కమలనాథులు వ్యక్తం చేస్తున్నారు. ఉత్తినే తామీ మాటల్ని చెప్పట్లేదని.. గ్రౌండ్ లో జరుగుతున్న అంశాల్ని పరిగణలోకి తీసుకున్నాకే చెబుతున్నట్లుగా చెబుతున్నారు.

ఇదిలా ఉంటే.. తాజాగా మరో సెంటిమెంట్ తెర మీదకు వచ్చింది. 2018లో జరిగిన సార్వత్రిక ఎన్నికల్లో తెలంగాణ అసెంబ్లీలో బీజేపీ తరఫున గెలిచిన ఏకైక ఎమ్మెల్యే రాజాసింగ్ మాత్రమే.

ఆ తర్వాత అనూహ్యంగా చోటు చేసుకున్న పరిణామాలతో రఘనందనరావు సంచలన విజయాన్ని సాధించటం.. కొద్ది కాలానికే టీఆర్ఎస్ లో కీలకంగా వ్యవహరించి.. తర్వాత కాలంలో చోటు చేసుకున్న పరిణామాలతో ఈటల రాజేందర్ బరిలోకి దిగటం.. ఆయన్ను ఓడించేందుకు గులాబీ బాస్ మొదలు ఆయన పరివారం మొత్తం ఎన్నో ప్రయత్నాలు చేశారు.

ఈ సందర్భంగా తెలంగాణ అసెంబ్లీలో ఉన్న రెండు 'ఆర్' లు (రాజాసింగ్.. రఘునందన్)లకు రాజేందర్ (మరో ఆర్) యాడ్ అవుతుందంటూ.. రాజమౌళి క్రేజీ మూవీ..'ఆర్ఆర్ఆర్' కాంబినేషన్ ఆవిష్క్రతం కానున్నట్లుగా ప్రచారం జరిగింది.

మొత్తంగా తాము చెప్పిందే జరిగిందని బీజేపీ నేతలు చెబుతున్నారు. తెలంగాణ అసెంబ్లీలో తాము చెప్పినట్లే త్రిపుల్ ఆర్ కాంబినేషన్ నెలకొందని.. మునుగోడు ఉప ఎన్నికతో 'ఆర్ఆర్ఆర్'కు మరో 'ఆర్' చేరటం ఖాయమన్న మాటను చెబుతున్నారు. నిజంగానే బీజేపీకి సెంటిమెంట్ గా మారిన 'ఆర్'కలిసి వచ్చి.. రాజగోపాల్ రెడ్డి గెలిస్తే మాత్రం.. తెలంగాణ అసెంబ్లీలో 'ఆర్ఆర్ఆర్ఆర్' అన్న రేర్ కాంబినేషన్ ఆవిష్క్రతమవుతుందని చెప్పక తప్పదు.