ధావన్ క్రికెట్ కెరీర్ ఒక విషాదముగింపు తప్పదా?

మొన్నటి టీ20 వరల్డ్ కప్ లో ఏమాత్రం రాణించని దినేశ్ కార్తీక్ ఇప్పుడు కామెంటేటర్ అవతారం ఎత్తాడు. ఇక తన అంతర్జాతీయ క్రికెట్ కు ముగింపు పడిందని అనుకుంటున్నాడేమో కానీ ఇప్పటి టీమిండియా క్రికెటర్లపై కామెంట్లతో వార్తల్లో నిలుస్తున్నాడు. తాజాగా టీమిండియా ఓపెనర్ శిఖర్ ధావన్ పై కార్తీక్ చేసిన కామెంట్లు హాట్ టాపిక్ గా మారాయి.

బంగ్లాదేశ్‌తో ఇటీవల ముగిసిన వన్డే సిరీస్‌లో భారత వెటరన్ ఓపెనింగ్ బ్యాటర్ శిఖర్ ధావన్ బ్యాట్‌తో ఘోరంగా విఫలమయ్యాడు. ఓపెనర్ గా వచ్చిన ధావన్ 7, 8 మరియు 3 స్కోర్‌లను మూడు మ్యాచుల్లో సాధించాడు. బంగ్లాదేశ్ చేతిలో భారత్ 1-2తో సిరీస్‌ను కోల్పోయింది. చివరి వన్డేలో, బొటనవేలు గాయం కారణంగా ఆట ఆడని భారత కెప్టెన్ రోహిత్ శర్మ స్థానంలో జట్టులోకి వచ్చిన తర్వాత యువ ఓపెనింగ్ బ్యాటర్ ఇషాన్ కిషన్ ఆల్ టైమ్ వేగవంతమైన డబుల్ సెంచరీని సాధించాడు. ఈ సిరీస్‌లో జట్టులో లేని భారత వికెట్ కీపర్-బ్యాటర్ దినేష్ కార్తీక్ వన్డే జట్టులో ధావన్ భవిష్యత్తుపై సందేహాలను లేవనెత్తాడు.

ఇషాన్ కిషన్ - గిల్ వంటి యువకుల ప్రస్తుత ఫామ్‌ను హైలైట్ చేస్తూ ధావన్ 'అద్భుతమైన వన్డే ఇంటర్నేషనల్ కెరీర్'కి ఇది ముగింపు అని దినేష్ కార్తీక్ సంచలన కామెంట్స్ చేశాడు. "శ్రీలంక సిరీస్ కోసం ధావన్ కు చోటు దక్కకపోవచ్చు. సెలెక్టర్లు ఇషాన్ కిషన్‌ను ఎలా తప్పించబోతున్నారు అనేది ఆసక్తికరంగా ఉంటుంది. శుభమాన్ గిల్ బాగా రాణిస్తున్నాడు. రోహిత్ శర్మ అందుబాటులో ఉంటే, ఎవరైనా తప్పుకోవాలి. అతనే (ధావన్) కావచ్చు. అది అద్భుతమైన ధావన్ కెరీర్‌కు విషాదకరమైన ముగింపు కావచ్చు. అయితే కొత్త సెలెక్టర్లకు కొన్ని ప్రశ్నలు సమాధానం ఇవ్వాలి" అని క్రిక్‌బజ్‌లో చర్చ సందర్భంగా కార్తీక్ చెప్పాడు.

2023లో భారత్‌లో వన్డే ప్రపంచకప్ జరగనున్న నేపథ్యంలో ధావన్ ప్లేయింగ్ ఎలెవన్‌లోకి రావడానికి కష్టపడవచ్చని కార్తీక్ చెప్పాడు. "ఆసక్తికరమైన విషయం ఏమిటంటే, శుబ్‌మాన్ గిల్ జట్టులో భాగమై ఉంటే, అతను ఫాంను బట్టి చూస్తే బహుశా ఓపెనింగ్ చేసి ఉండేవాడు. ఇషాన్ కిషన్ డబుల్ సెంచరీ చేయడంతో రెండు చేతుల అవకాశాన్ని తీసుకున్నాడు. ఒక ఓపెనర్ గా ఖాయం చేసుకున్నాడు. ఇది శిఖర్ ధావన్‌ని టీంలోంచి తీసేయడానికి కారణం అవుతుంది" అని దినేశ్ కార్తీక్ అన్నాడు.

ధావన్ టెస్టులు , టీ20లు రెండింటిలోనూ పక్కన పెట్టేశారు. ఒక్క భారత వన్డేల్లో మాత్రమే ఒక భాగంగా ఉన్నాడు. ధావన్ 50 ఓవర్ల ఫార్మాట్‌లో కొన్ని సందర్భాల్లో భారత జట్టుకు కెప్టెన్‌గా కూడా ఉన్నాడు. రోహిత్, కేఎల్ రాహుల్ రావడంతో ఇప్పుడు కెప్టెన్సీకే కాదు.. జట్టులో చోటును ధావన్ తన ఫాంను కోల్పోయి ప్రశ్నార్థకం చేసుకున్నాడు.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.