శంషాబాద్ ఎయిర్ పోర్ట్ లో మహిళా తీవ్రవాది?

చూసేందుకు చాలా సాదాసీదాగా.. ఆధునాతనంగా కనిపిస్తూ.. దుబాయ్ వెళ్లాల్సిన విమానం ఎక్కేందుకు వచ్చిన మహిళను శంషాబాద్ ఎయిర్ పోర్ట్ లో పోలీసులు అదుపులోకి తీసుకున్నారు. ప్రపంచాన్ని వణికిస్తున్న ఇస్లామిక్ స్టేట్ తీవ్రవాద సంస్థలో పని చేస్తున్న ఈ మహిళను పక్కా సమాచారంతో అదుపులోకి తీసుకున్నట్లు తెలుస్తోంది.

నిక్క జోసెఫ్ పేరుతో ఉన్న ఈమె.. ఐఎస్ లోకి రిక్రూట్ చేసుకునేందుకు హైదరాబాద్ వచ్చిందని భావిస్తున్నారు. జనవరిలో అరెస్ట్ చేసిన ఉగ్రవాది మొయినుద్దీన్ కు ప్రియురాలే ఈ నిక్కీ జోసెఫ్ గా భావిస్తున్నారు. 2011లో మొయినుద్దీన్ తో ప్రేమలో పడ్డ ఈమె కొంతకాలం హైదరాబాద్ లోనే ఉండి.. ఆ తర్వాత దుబాయ్ వెళ్లిందని.. పోలీసులు తాజాగా ఆమెను చాకచక్యంగా రప్పించి అదుపులోకి తీసుకున్నట్లుగా చెబుతున్నారు.

బ్రిటన్ దేశస్తురాలిగా చెబుతున్న నిక్కీ జోసెఫ్ ను అదుపులోకి తీసుకున్న నేపథ్యంలో ఐసిస్ లో హైదరాబాద్ పాత్రేమిటి? ఇక్కడ ఎవరెవరితో సంబంధాలు ఉన్నాయి? రిక్రూట్ మెంట్ సంగతేంది? ఇలాంటి ఎన్నో విషయాల మీద పోలీసులకు సమాచారం అందే అవకాశం ఉందని భావిస్తున్నారు.