లైంగిక వేధింపుల కేసు .. భారీ పరిహారం అందుకున్న సెక్స్ వర్కర్

న్యూజీలాండ్‌ లో ఒక యజమాని తనపై లైంగిక వేధింపులకు పాల్పడినట్లు కేసు వేసిన ఒక సెక్స్ వర్కర్ తాజాగా ఆరంకెల భారీ మొత్తాన్ని పరిహారంగా అందుకున్నారు. మహిళ భావోద్వేగాలకు హాని కలిగించి, ఆదాయం కోల్పోయేలా చేశారంటూ వేసిన ఈ కేసు సెటిల్‌ మెంట్‌ లో భాగంగా బాధితురాలికి ఈ మొత్తం అందినట్లు ఆమె తరపున వాదించిన ఒక మానవ హక్కుల సంస్థ వెల్లడించింది. వేశ్యా వృత్తిని నేరంగా చూడకూడదని చెబుతూ 2003లో న్యూజీలాండ్ ఒక చట్టం ఆమోదించింది. ఈ కేసులో విచారణ వివరాలను, వాదులు, ప్రతివాదుల గుర్తింపును రహస్యంగా ఉంచారు.

కానీ, ఈ కేసులో సోమవారం ఇచ్చిన తీర్పును వేశ్యావృత్తిలో ఉన్న వారి హక్కులకు సంబంధించి ఒక మైలురాయిగా భావిస్తున్నారు. వేశ్యావృత్తిలో ఉన్న ఒక సెక్స్ వర్కర్‌ కు ఇలాంటి పరిష్కారం అందించడం చాలా గొప్ప విషయం. మనం ఏ పని చేస్తున్నా, అక్కడ జరిగే అన్యాయాన్ని ఎదుర్కోడానికి ఇలాంటివి ధైర్యాన్ని ఇస్తాయి. ఈ వ్యాపారాల్లో ఉన్నవారికి ఇది మేలుకొలుపు అని న్యూజీలాండ్‌ లో సెక్స్ వర్కర్ల హక్కుల కోసం ఉద్యమించే డేమ్ కేథరీన్ హీలే అన్నారు. 2003లో ఆమోదించిన ఈ చట్టంతో వేశ్యాగృహాల్లో వ్యాపారం చట్టబద్ధం అయ్యింది. సెక్స్ వర్కర్లకు పూర్తి ఉపాధి హక్కులను అందాయి.

పనితో సంబంధం లేకుండా కార్మికులందరికీ పనిచేసే చోట లైంగిక వేధింపుల నుంచి విముక్తి పొందే హక్కు ఉంది. వ్యాపార సంస్థల యజమానులు, యాజమాన్యాలు ఆ హక్కులను గౌరవించడాన్ని మేం ప్రోత్సహిస్తాం అని న్యూజీలాండ్‌ మానవ హక్కుల కార్యాలయం డైరెక్టర్ మైకేల్ టిమ్మిన్స్ సోమవారం ఒక ప్రకటనలో తెలిపారు.