ప్రపంచ బ్యాంకు కరుణ: భారత్‌ కు భారీ సాయం

కరోనా మహమ్మారిపై పోరాడుతున్న భారతదేశంపై ప్రపంచ బ్యాంక్‌ కరుణ చూపింది. కరోనాపై పోరుకు ప్రపంచ బ్యాంకు భారత్‌ కు బిలియన్‌ డాలర్ల (సుమారు రూ.7,600 కోట్లు) అత్యవసర సాయం ప్రకటించింది. భారతదేశం చేసిన విజ్ఞప్తికి ప్రపంచ బ్యాంకు స్పందించి ఈ మేరకు సహాయం అందించింది. బోర్డు ఎగ్జిక్యూటివ్‌ డైరెక్టర్ల సమావేశం గురువారం జరగ్గా కరోనా మహమ్మారిపై తీవ్రంగా చర్చించారు. కరోనా నివారణకు ప్రపంచ సంస్థగా ఉన్న తాము ఏం చేయాలనేది దానిపై చర్చించారు. ఆ క్రమంలోనే భారత్‌ చేసిన విజ్ఞప్తిని పరిశీలించారు. సమావేశం అనంతరం ప్రపంచబ్యాంకు ప్రతినిధులు కరోనా వైరస్‌ తో ప్రభావితమవుతున్న ప్రపంచంలోని 25 దేశాలకు సహాయం చేయాలని నిర్ణయించింది. ఈ నేపథ్యంలో మొత్తం 25దేశాలకు 1.9 బిలియన్‌ డాలర్ల అత్యవసర సాయం ప్రకటించింది. వాటిలో అత్యధికంగా భారత్‌ కు 1 బిలియన్‌ డాలర్లను కేటాయిస్తున్నట్టు ప్రపంచ బ్యాంక్‌ ప్రతినిధులు ప్రకటించారు.

స్క్రీనింగ్‌ - కాంటాక్ట్‌ కేసుల ట్రేసింగ్‌ - లేబొరేటరీ డయాగ్నోస్టిక్స్‌ - వైద్యులకు పర్సనల్‌ ప్రొటెక్టివ్‌ ఎక్విప్‌ మెంట్‌ - నూతన ఐసోలేషన్‌ వార్డుల ఏర్పాటు కోసం ఈ నిధులు ఇస్తున్నట్లు ప్రపంచ బ్యాంక్‌ ప్రకటించింది. ఆ 25 దేశాల్లో భారతదేశానికి సింహభాగం ప్రకటించడం విశేషం. కరోనాతో పోరాడుతూ దేశాన్ని పూర్తిగా స్తంభించడంతో భారత ఆర్థిక వ్యవస్థ ప్రస్తుతం తీవ్రంగా దెబ్బతింది. ఈ క్రమంలో ప్రపంచ బ్యాంక్‌ సహాయం ప్రకటించడంతో కొంతలో కొంత భారతదేశానికి ఊరట లభించింది. అయితే కరోనా ప్రభావంతో ప్రపంచ ఆర్థిక వ్యవస్థ కూడా తీవ్రంగా ప్రభావితమైంది. ప్రస్తుతం ఒడిదుడుకులతో కొనసాగుతోంది. ఈ క్రమంలో ప్రపంచ బ్యాంక్‌ నివారణ చర్యలు - ఆర్థిక వ్యవస్థ పుంజుకునేందుకు చర్యలు ప్రారంభించింది. ఈ సందర్భంగా ఆర్థిక వ్యవస్థ పురోగతికి - ప్రజల ఆరోగ్య పరిరక్షణకు వచ్చే 15 నెలల్లో 160 బిలియన్‌ డాలర్ల ఆర్థిక ప్యాకేజీ పై ప్రణాళికలు వేస్తున్నట్లు ప్రపంచ బ్యాంకు ప్రకటించింది. ఈ మొత్తాన్ని దారిద్య్ర నిర్మూలనపై - నిరుపేదలను ఆదుకునేందుకు - పర్యావరణ పరిరక్షణకు ఖర్చు చేస్తామని వెల్లడించింది.

పలు దేశాలకు ప్రపంచ బ్యాంక్‌ సహాయం ఇలా..

పాకిస్తాన్‌ కు 200 మిలియన్‌ డాలర్లు
ఆఫ్గనిస్థాన్‌ కు 100 మిలియన్‌ డాలర్లు
మాల్దీవులకు 7.3 మిలియన్‌ డాలర్లు
శ్రీలంకకు 128.6 మిలియన్‌ డాలర్లు