అమెరికాలో హైదరాబాద్ యువకుడు మృతి

అమెరికాలో మరో హైదరాబాదీ యువకుడు మృతి చెందాడు. స్థానిక కాలమానం ప్రకారం శనివారం ఉదయం ఈ దుర్ఘటన జరిగింది. హైదరాబాద్‌ లోని జగద్గిరిగుట్ట సంజయ్ గాంధీనగర్‌ కు చెందిన ఆమిర్ ఉన్నత చదువుల కోసం ఐదు సంవత్సరాల క్రితం టెక్సాస్ వెళ్లాడు. అక్కడ విద్యనభ్యసిస్తున్న క్రమంలో శనివారం ఉదయం గుండెపోటుతో కన్నుమూశాడు. ఆమిర్ జూన్ 2న హైదరాబాద్ వచ్చేందుకు సన్నాహాలు చేసుకున్నాడు. ఈ క్రమంలో అతడు మరణించడంతో నగరంలోని కుటుంబ సభ్యులు కన్నీరుమున్నీరు అవుతున్నారు.

వారం రోజుల క్రితం హైదరాబాద్‌ ముషీరాబాద్‌ కు చెందిన జి.సాహిత్‌ రెడ్డి (25) రోడ్డు ప్రమాదంలో మరణించిన విషయం తెలిసిందే. నల్లకుంట ఠాణా పరిధిలోని పద్మాకాలనీలో ఉంటున్న అడిక్‌ మెట్‌ డివిజన్‌ జీహెచ్‌ ఎంసీ వార్డు కమిటీ సభ్యుడు - టీఆర్‌ ఎస్‌ నాయకుడు మధుసూదన్‌ రెడ్డి - లక్ష్మీ దంపతులకు సాహిత్‌ రెడ్డి (25) - సంజిత్‌ రెడ్డి (23) సంతానం. సీబీఐటీలో ఇంజనీరింగ్‌ పూర్తి చేసిన సాహిత్‌.. 2016లో అమెరికా వెళ్లాడు. ఇటీవలే ఎంఎస్‌ పూర్తి చేసి ఉద్యోగంలో చేరాడు. నార్త్‌ కరోలినా క్యారిసిటీలోని ఓ అపార్ట్‌ మెంట్‌ లో స్నేహితులతో కలిసి నివాసం ఉంటున్నాడు. ఆదివారం తెల్లవారుజామున 3.30 గంటలకు వాకింగ్‌ చేస్తున్న సమయంలో వెనుక నుంచి వేగంగా వచ్చిన ఓ కారు సాహిత్‌ ను ఢీకొట్టింది. దీంతో అతను అక్కడికక్కడే మృతి చెందాడు.