జగన్ లండన్ లో వారిని కలబోతున్నారా?

అతి త్వరలోనే లండన్ పర్యటన చేపట్టబోతున్నారు వైఎస్సార్ కాంగ్రెస్ పార్టీ అధినేత జగన్ మోహన్ రెడ్డి. జగన్ పెద్ద కూతురు లండన్లో చదువుకుంటున్న సంగతి తెలిసిందే. ప్రఖ్యాత వర్సిటీలో మెరిట్ లో సీటు సాధించి అక్కడ చదువుకుంటోంది జగన్ మోహన్ రెడ్డి పెద్ద కూతురు. దాదాపు ఏడాది కాలం పైనే జగన్ మోహన్ రెడ్డి పాదయాత్రతో బిజీగా గడిపారు.

ఆ సమయమంతా జగన్ కూతురును చూడటానికి వెళ్లలేకపోయారు. ఈ నేపథ్యంలో పాదయాత్ర ముగిసిన వెంటనే జగన్ లండన్ వెళ్తారనే మాట వినిపించింది. అయితే ఎందుకో అప్పుడు ఆ కార్యక్రమాన్ని రద్దు చేసుకున్నారు. అయితే ఈ నెలలోనే జగన్ లండన్ వెళ్లబోతున్నారని తెలుస్తోంది.

కూతురును చూసి రావడానికి అక్కడకు వెళ్తున్న జగన్ మోహన్ రెడ్డి.. లండన్ లో కొంతమంది ప్రముఖులను కూడా కలబోతున్నారని సమాచారం. లండన్ లో ఉండే భారతీయ నేపథ్యం ఉన్న పారిశ్రామిక వేత్త లక్ష్మీ మిట్టల్ తో జగన్ సమావేశం కాబోతున్నారని సమాచారం.

పారిశ్రామికవేత్తగా - గొప్ప శ్రీమంతుడిగా లక్ష్మీ మిట్టల్ కు పేరుంది. బ్రిటన్ లోని అపరకుభేరుల్లో కూడా టాప్ లో ఉంటారు మిట్టల్. ఆయనతో జగన్ సమావేశం కాబోతున్నారని సమాచారం. అలాగే పేరున్న వైద్యులు.. పలు హాస్పిటల్స్ ను నెలకొల్పిన ప్రేమ సాగర్ రెడ్డిని కూడా జగన్ కలవబోతున్నారని తెలుస్తోంది.

ఇలా పారిశ్రామిక వేత్తలు - ప్రముఖులతో జగన్ లండన్లో సమావేశం కాబోతున్నారని.. ఏపీలో వైఎస్సార్సీపీకి ఊపు ఉన్న నేపథ్యంలో.. జగన్ తో సదరు ప్రముఖులు కూడా సమావేశానికి ఉత్సాహం చూపిస్తున్నారని సమాచారం.