జగన్ ఎంచక్కా గోల్ఫ్ ఆడుకుంటున్నారు

ప్రజా సమస్యలపై గళం విప్పుతూ.. వారి కోసమే తాము బతుకుతున్నట్లుగా రాజకీయ నేతలు వ్యవహరిస్తుంటారు. కానీ.. అందుకు భిన్నంగా వారిదైన పర్సనల్ లైఫ్ లో బాగానే గడిపేస్తుంటారు. తాజాగా అలాంటి విషయాన్నే చెప్పేలా ఏపీ విపక్ష నేతకు చెందిన కొన్ని ఫోటోలు ఇప్పుడు సోషల్ మీడియాలో వైరల్ అవుతున్నాయి. ప్రస్తుతం వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి విదేశీ పర్యటనలో ఉన్న సంగతి తెలిసిందే.

భార్య.. కుటుంబ సభ్యులతో కలిసి ప్రస్తుతం బ్రిటన్.. స్కాట్లాండ్ లో ఉన్న జగన్ తాజాగా ఈడన్ బర్గ్ చేరుకున్నారు. అక్కడ ఆయన గోల్ఫ్ ఆడుతూ ఉన్న వేళ తీసిన ఫోటోలు ఇప్పుడు బయటకు వచ్చాయి. మొత్తం తన పది రోజుల విదేశీ పర్యటనలో ఏడు రోజులు యూకేలో గడిపిన జగన్.. మరో మూడు రోజులు ఐర్లాండ్.. స్కాట్లాండ్ లో గడపనున్నారు.

ఓపక్క పార్టీలో పరిస్థితి రోజురోజుకి దిగజారుతున్న వేళ.. ఆందోళనతో పార్టీ నేతలంతా అధినేత కోసం వెయిట్ చేస్తుంటే.. మరోవైపు జగన్ మాత్రం గోల్ఫ్ ఆడుతున్న ఫోటోలు సోషల్ మీడియాలో రావటం అందరిని విస్మయానికి గురి చేస్తోంది. కృష్ణా జలాల మీద రెండు రాష్ట్రాల మధ్య హాట్ హాట్ గా చర్చలు జరుగుతున్న వేళ.. గోల్ఫ్ ఆడుకుంటూనే.. కృష్ణా జలాల మీద తన వైఖరిని స్పష్టం చేస్తూ ఒక ప్రెస్ నోట్ విడుదల చేస్తే బాగుండేది కదా? అంటూ ప్రశ్నిస్తున్నారు. వారి పాయింట్ లోనూ అర్థం ఉందనే చెప్పాలి. మరి.. ఈ విషయాల్ని జగన్ కు చెప్పే వారెవరు?