బాల‌య్య క‌నిపించ‌డం లేద‌ని పోలీస్ కంప్లైంట్‌

తెలుగుదేశం పార్టీ ఎమ్మెల్యే - సినీ న‌టుడు నంద‌మూరి బాలకృష్ణ‌పై పోలీసుల‌కు ఊహించ‌ని ఫిర్యాదు అందింది. బాల‌య్య బాబు క‌నిపించ‌డం లేదంటూ పోలీసులకు కంప్లైంట్ చేశారు. ఈ ఫిర్యాదు చేసింది బాల‌య్య ప్రాతినిధ్యం వ‌హిస్తున్న అనంత‌పురం జిల్లా వైసీపీ నేత‌లు. కొద్దికాలం క్రితం వ‌ర‌కు త‌న పీఏ వ్య‌వ‌హార‌శైలి కార‌ణంగా హిందూపురం విష‌యంలో ఇర‌కాటంలో ప‌డ్డ బాల‌కృష్ణ ఇప్పుడు ప్ర‌తిపక్ష నేత‌ల కార‌ణంగా వార్త‌ల్లోకి ఎక్కారు.

టీడీపీ త‌ర‌ఫున ఎమ్మెల్యేగా గెలిచిన బాల‌కృష్ణ నియోజ‌క‌వ‌ర్గంలోని ప్ర‌జ‌ల‌కు అందుబాటులో ఉండ‌టం లేద‌నే అభిప్రాయం స్థానికుల్లో బ‌లంగానే ఉంది. ఈ విష‌యంలో ఒక‌డుగు ముందుకు వేసిన వైసీపీ ఈ అసంతృప్తికి కొత్త రూపు ఇచ్చింది. ఎమ్మెల్యేగా ఉన్న బాల‌కృష్ణ క‌నిపించ‌డం లేదంటూ అనంత‌పురం వ‌న్ టౌన్ పోలీసుల‌కు వైసీపీ నేతలు ఫిర్యాదు చేశారు. ఈ సంద‌ర్భంగా విప‌క్ష నేత‌లు మాట్లాడుతూ సినిమాల‌కే ప్రాధాన్యం ఇస్తున్న బాల‌య్య నియోజ‌క‌వ‌ర్గాన్ని గాలికి వ‌దిలేశార‌ని ఆరోపించారు. స్థానిక ప్ర‌జ‌లు ఎన్నో స‌స‌మ‌స్య‌ల‌ను ఎదుర్కొంటున్న‌ప్ప‌టికీ బాల‌య్య తన సినిమాల్లో హిందూపురం వైపు క‌న్నెత్తి చూడ‌టం లేద‌ని విమ‌ర్శించారు. అందుకే తాము ప్ర‌జ‌ల ప‌క్షాన ఫిర్యాదు చేసిన‌ట్లు వైసీపీ నేత‌లు వివ‌రించారు.

కాగా, ఈ ఫిర్యాదును టీడీపీ నేత‌లు త‌ప్పుప‌ట్టారు. హిందూపురం అభివృద్ధిని ఓర్వలేక‌నే వైసీపీ నేత‌లు త‌ప్పుడు ఫిర్యాదు చేశార‌ని తెలిపారు. బాల‌య్య సినిమాల‌తో పాటు హిందూపురం అభివృద్ధికి కృషి చేస్తున్నార‌ని వారు వివ‌రించారు.

Like Us on Facebook : https://www.facebook.com/Tupakidotcom/