వైసీపీ రివర్స్ ఆపరేషన్.. టీడీపీలో కంగారు

ఆపరేషన్ ఆకర్ష్ చేపట్టి 20 మంది వైసీపీ ఎమ్మెల్యేలను చేర్చుకున్న టీడీపీ ఇప్పుడు అదే వైసీపీ మొదలుపెట్టిన కొత్త ఆపరేషన్‌ తో కంగారుపడుతోంది. తెలంగాణ ఎన్నికల్లో చంద్రబాబు బొక్కబోర్లా పడడంతో వైసీపీ ఇదే మంచి తరుణమంటూ దూకుడు పెంచుతోంది. ముఖ్యంగా టీడీపీలో అసంతృప్త ఎమ్మెల్యేలు - ఇమడలేకపోతున్న సీనియర్ నేతలతో వైసీపీ టచ్‌ లోకి వెళ్తోంది.

కీలక నేత విజయసాయిరెడ్డే స్వయంగా పలువురు టీడీపీ నేతలకు ఫోన్ చేసి వచ్చే ఎన్నికల్లో టీడీపీ భవితవ్యం ఎలా ఉండబోతోందో చెబుతున్నారట. తెలంగాణలో వచ్చిన రిజల్టే ఏపీలోనూ వస్తుందని.. టీడీపీలో ఉంటే రాజకీయ భవిష్యత్తు ఉండదని.. రానున్నది జగన్ ప్రభుత్వమేనని ఆయన నేతలకు వివరిస్తున్నట్లు తెలుస్తోంది. ఇప్పటికే పలువురు టీడీపీ నేతలూ ఇదే అంచనాలతో ఉండడంతో వారు వైసీపీలోకి వచ్చేందుకు సిద్ధమవుతున్నట్లు టాక్.

మరోవైపు విజయసాయి రెడ్డి టీడీపీలోని ఓ పెద్ద నేతతో టచ్‌ లో ఉన్న సంగతి ఆ పార్టీ అధిష్ఠానం గుర్తించి ఆ నేతను బుజ్జగిస్తున్నట్లు తెలుస్తోంది. వైసీపీ నుంచి ఎమ్మెల్యేలు టీడీపీలోకి గతంలో వెళ్లడంతో అక్కడ టీడీపీలో పోటీ ఉంది. దీంతో టిక్కెట్లపై నమ్మకం లేని నేతలు వైసీపీ వైపు చూస్తున్నారు. ఈ అవకాశాన్ని ఉపయోగించుకునే ప్రయత్నాల్లోనే విజయసాయి రెడ్డి ఉన్నట్లు సమాచారం. దీంతో టీడీపీ పెద్దల్లో టెన్షన్ మొదలైనట్లు తెలుస్తోంది.